jueves 19 de junio de 2014 - 19h30
Presentación del llibru "Un reflejo de la sociedad"
Amadeu Casellas tá acabante d'escribir un llibru nel que relata dalgunos de los sus atracos y la su posterior esperiencia nes cárceles. Na obra, el convictu de Tona denuncia la vida que los reclusos lleven na cárcel, la reforma del Códigu penal y la corrupción de los cargos políticos nel sistema carcelariu. El llibru lleva por títulu "Reflejos de la sociedad. Cróniques de les cárceles de la democracia". El llibru, según desplica Casellas, escribiólu él mesmu, y empezó a redactalu en 2011. Decidió contar la su esperiencia a petición de dalgunes persones del su entornu.
Casellas salió en llibertá en marzu de 2011, dempués de protagonizar una fuelga fame que contó col apoyu de colectivos anarquistes y d'ayuda a los presos. Pasara 24 años na cárcel y llogró que se-y aplicare la doctrina del Tribunal Constitucional , esistente dende 2008, que prevé computar los años de prisión preventiva como condena firme. Por embargu, meses dempués foi condenáu a tres años de prisión pol intentu de la su compañera de meter droga na cárcel y tuvo que volver a ingresar unos cuantos meses, durante'l 2012. Entonces aplicáron-y el tercer gráu. Dende esa fecha tá en llibertá y totalmente "llimpiu", asegura. El su casu, por embargu, nun tá zarráu y sigue nos tribunales. Según Casellas, l'Estáu tién que paga-y una indemnización que tovía nun se fizo efectiva, correspondiente a los cinco años de más que pasó en prisión.
