viernes 19 de abril de 2024 - 18h30
Presentación del llibru "El pesu la llibertá(Insumisa)"
AL COLLACIU FERNANDO, QUE RECONQUISTÓ L'HORIZONTE
Texto de Paco Álvarez
A les ocho de la mañana abríen les celdes y en pocos minutos Fernando González Rodríguez y Jesus (ensin tilde, pronúnciese "Yesus"), un presu cubano-neoyorquín con musculatura y xenética envidiables, yá taben galguiando alredor del patiu del módulu dos de la cárcel. Yo echaba a correr tres d'ellos intentando resistir el so ritmu… hasta que m'humildaben doblándome na tercer vuelta dambos: el compañeru negru, con un físicu impresionante y una mente feble que lu llevara a prisión por mala cabeza, y el compañeru blancu, con un físicu esmirriáu pero con una mente de fierro que lu llevara a prisión por defender les sos idees.
Fer y yo, insumisos, entramos xuntos na cárcel en mayu de 1996 y salimos xuntos de la cárcel en xunetu de 1997. A metá de condena'l subdirector de Seguridá de la cárcel quixo joder a Fernando por tener una bandera independentista d'Asturies colgada na paré de la celda: mandólu a la parte interior del módulu, onde tenía como paisaxe una muria de formigón y un enriedu d'alambraes; nun podía relaxar la mirada (esi mirada azul Cantábricu que tien Fer) mirando al monte d'esti país, que ye l'únicu país nel que se reconoz él, que nun dexa de ser por ello internacionalista.
Dempués d'aquello Fernando salía a correr al patiu inda con más brenga. Años dempués, cuando empezó a espuntar y trunfar en carreres de montañes, en retos estremos (ganó les Cien Milles del Himalaya, completó el Grand Slam de siete maratones en siete continentes...), llegué a la conclusión de que Fer, que nunca dexó de llau por esos retos les lluches sociales que lu definen, taba rompiendo fronteres pa reconquistar l'horizonte robáu na prisión asturiana.
Fer presenta la selmana qu'entra'l so llibru nuevu, nel que fala de la llibertá y de los insumisos que lluchamos por ella. Y ellí vamos tar.
