Axenda Mazucu

Concentración 25 de mayu: "1808-2015: Asturies Enxamás Vencida"

Esti llunes 25 de mayu, a les 19.30h facemos un llamáu a nun escaecer, a salir a la cai y defender, 207 años depués del llevantamientu de 1808, la soberanía popular asturiana pa camudalo too.

En 1808, tres de la invasión francesa, prodúcense unos fechos qu'algamen el calter de revolucionarios nel nuesu país.

La Xunta Xeneral declararáse soberana, declara la guerra al imperiu económicu y militar de la so dómina, Francia, unvía embaxadores asturianos a Inglaterra y crea la bandera asturiana y l'Exércitu Defensivu Asturianu. Y pa que pasaren estos fechos hestóricos, el puxu popular nes cais foi determinante: mesmo cola participación de dos muyeres, Xuaca Bobela y Marica Andayón, como de los estudiantes de la Universidá.

Pero nun hemos quedar namás na alcordanza y na señaldá. Hemos d'anovar y siguir dotando de conteníu y de sentíu a esta fecha y a l'Asturies que nos arrodia güei, en 2015.

Vivimos l'Asturies del paru, de la emigración forciao que dexa'l país ermu, de la reconversión industrial permanente, de la falta de derechos coleutivos ya individuales. Vivimos l'Asturies del autoodiu, de la negación y ridiculización de lo propio, de la desapaición de los seutores productivos clásicos del país, del patriarcáu que se ceba cola metá del nuesu pueblu. L'Asturies de los desagospios, de los EREs y de los puestos de trabayu cada vegada más precarios, de la sanidá y educación cada vuelta más deterioraes y en peores condiciones mesmo pa trabayadores y usuarios/es. L'Asturies de la especulación urbanística y la depredación xabaz del país, de la recapitalización de la banca, de la corrupción y les redes clientelares, del despoblamientu del mundu rural. L'Asturies que pasa frío porque nun pue pagar la enerxía que se produz a espuertes.

Pero énte esti panorama tamién hai otra Asturies. La que llucha, la que fala nes sos llingües, la que caltién espacios populares. L'Asturies que ta na cai, la que se moviliza escontra la represión, la que s'auto-organiza en coleutivos de trabayadores escontra los despidos. La que ye heriede de la memoria y la resistencia popular na llarga nueche del franquismu. La que defende'l territoriu y apuesta por que les que colaron tornen y les que tán equí nun tengan que colar. La que mira por un modelu productivu propiu, axeitáu con procuru al nuesu mediu ambiente. La que cree en redes de consumu cercanu. La qu'apuesta por multiculturalidá ya intercambiu y non pola imposición aculturizadora. La que quier trabayar pa vivir y non vivir pa trabayar. L'Asturies que quier otra Asturies.

L'añu pasáu, tres d'entamar la dinámica abierta de bloques unitarios soberanistes en movilizaciones, convocáremos una concentración énte la Xunta Xeneral que, cola sida de ser xornada de reflexón, foi prohibida pola xunta eleutoral central. Nada más exemplificante de la situación na que ta esti país.

Agora, como en 1808, tócanos llamar a conceyu. Tócanos ser la Xuaca Bobela, la Marica Andayón y los estudiantes de 1808 de la nuesa dómina. Tócanos emburriar pola soberanía popular asturiana. Pa camudalo too.

El 25 de mayu,

¡Asturies Enxamás Vencida!

¡Puxa Asturies llibre!

Origen : https://www.facebook.com/events/1391982054464

Origen : mensaje recibido el 19 mayo 16h