tema :
Comentar (0)EnviariCalCompartir

sábado 30 de abril de 2016 - 19h

Espircha La Semiente. Al estilu de les de La Cuenca.

REIVINDICANDO LA ESPIRCHA. (versión n'asturiano).
Los díes 29 y 30 d'abril el Centru Social Autoxestionáu la Semiente, coincidiendo col so quintu aniversariu entama una Espircha Tradicional al estilu de les que se faen na cuenca del Nalón.
Anguaño'l términu espicha yá nun s'utiliza namás pa falar de les celebraciones que se faen nos llagares cuando la sidra ta pa corchar y ábrese o espíchase una pipa o un tonel pa beber d'éllos y comer de pies alredor d'una mesa los productos típicos de la espicha. Non. Anguaño y, por motivos comerciales unes veces y por evolución del llinguaxe otres, llámase-y espicha a cualquier pinchéu, yá sía de sidra corchao, vino o lo que sía. Anguaño tamién llamen espiches a grandes cenes d'empresa o de compañeros y amigos onde se comparten raciones. Mui conocíes son les espiches que los estudiantes de distintes facultaes universitaries entamen dacuando y que nun son otru que grandes fiestes con bébora blanco y música electrónica unes veces o grandes quedaes pa beber albentestate otres, lo que suel llamase-y botellón. Esti últimu usu de la palabra espicha foi incorporáu yá a les fiestes de facultaes fora de Asturies, siendo anguaño más famoses yá les entamaes pol alumnáu de la Universidá de Llión qu'el de la Universidá d'Uviéu.
El términu espicha nun ye otru que espita o dúcil, y fai referencia a la espicha que se pon al tonel o a la pipa por que sala la sidra dende ésti. La variante local del términu espicha na cuenca del Nalón ye espircha y, anque ta cayendo en desusu y delles persones equivocadamente piensen que ye un vulgarismu, trátase de la palabra patrimonial de la zona y nel subconsciente colectivu ta amestada a muncho más qu'un pinchéu o una cena.
Amás de les tradicionales espiches nos llagares grandes o medianos, siempre esistieron les espiches caseres, les de los pueblos, les de los barrios, les de les asociaciones… Na cuenca'l Nalón ye bien tradicional la ellaboración de sidra, yá non a nivel industrial, sinón a nivel familiar, individual o d'un grupu d'amigos y/o vecinos. Trátase de producciones pequeñes de sidra qu'unes veces van pal consumu propiu y otres a cencielles pa espichar, yá sía nun convite priváu o abiertu al públicu. De normal yera y ye bien común qu'asociaciones de vecinos, parroquiales, de festexos o vecinales entamaren esti tipu d'espiches, yá non yá como actividá social, lúdica, festiva y gastronómica, sinón tamién como forma d'autoxestión económica pa dempués faer otres coses. Esti tipu d'espiches pequeñes, con menor fortuna que va unos años, celébrense nos conceyos del valle del Nalón tradicionalmente ente los meses de marzu, abril y mayu, y nelles ye típico comer tortiella, llacón, empanada, güevos cocíos, bígaros, chorizu, quesu…. Al contrariu que'n delles espiches de llagares grandes, equí nun se va a preciu zarráu nin barra llibre de comida y sidra. Non, lo que se fai ye pagar cada consumición: los pinchos págense por unidaes y la sidra tamién; nun se bebe enllenando'l vasu de la pipa, lo que se fai ye enllenar les botelles de la pipa y vendeles según el veceru pida. Suelen o solíen faese en llagares pequeños, baxos, locales, cortes en desusu, cocheres… Nos conceyos de Samartín del Rei Aurelio y Llaviana teníen tanto ésitu, que los ayuntamientos dende va unos años regularon la so celebración con normatives municipales qu'establecen quién pue faeles, en qué feches y qué productos puen despachase o non, ente otres coses. Pue qu'ésta sía una de les causes poles que cada vez heba más espiches dientro de los mesmos chigres o sidreríes y menos espiches tradicionales entamaes por asociaciones o vecinos.
La Semiente quixímos realizar esta Espircha yá non yá como forma d'autoxestión del centru social, nin simplemente como celebración del quintu aniversario nuestru, sinón pa reivindicar una forma de socializar que ta perdiéndose, pa revitalizar una actividá que puquiñin a puquiñin va desvirtuándose o de la cual el so nome y la so razón de ser tán quedando soterraos so los nuevos usos de la palabra, yá sían pincheos, botellones o simples cenes d'empresa. Dende La Semiente queremos reivindicar la sidra nuevo, la primavera, los productos de la tierra, la música tradicional,los cantares de chigre, la socialización y l'autoxestión como daqué que siempre tuvo na nuestra cultura y que nun tien que perdese. Y sobremanera, queremos reivindicar la variante local de la palabra, ESPIRCHA, pa espeyar, amás de too esto, esi tastu especial que tienen les celebraes nel Nalón, y como non, tamién como cuñu calidá y identidá local.