Axenda Mazucu

Flórez Estrada.Economista,patriota, revolucionariu y profesor n'Oxford

CONFERENCIA D'ÁSTURA DEL 14 DE FEBRERU

Anunciámosvos una gran conferencia del profesor David M. Rivas sobro ún de los personaxes más importantes de la nuesa hestoria, el gran economista y políticu somedanu Álvaro Flórez Estrada, que tuvo a la cabeza'l país nel momentu decisivu: la proclamación de la soberanía d'Asturies en 1808 y tolos sucesos resultantes.

LA CONFERENCIA D'ÁSTURA DEL MARTES 14

L'ANTIGUU PROFESOR TITULAR D'ESTRUCTURA ECONÓMICA DE LA U.A.M. DAVID M. RIVAS VENDRÁ FALANOS D'ÁLVARO FLÓREZ ESTRADA, GRAN ECONOMISTA, POLÍTICU LLIBERAL Y REVOLUCIONARIU ASTURIANU NEL 170 ANIVERSARIU DE LA SO MUERTE EN NOREÑA EN 1853.

---------

Atenéu Obreru de Xixón, 19:00 hores

Antigua Escuela Comerciu, 2ª planta

---------

Álvaro Flórez Estrada, ñacíu en Somiedu en 1766, ye'l gran teóricu de la economía de la illustración asturiana, reconocíu como tal por John Stuart Mill. La so teoría monetaria, mui anterior al neoclasicismu, foi emplegada pol mesmu Marx. Lliberal radical, la so visión de la desamortización ye d'una orixinalidá sorprendente, por cuanto defende la propiedá comunal de la tierra compatible con un usu priváu, inspirándose pa ello nos usos tradicionales asturianos.

Fuera la figura pública más importante del 25 de mayu de 1808, presidiendo la Xunta Suprema d'Asturies, que declaró la guerra a Francia, unvió embaxadores al Reinu Xuníu y reclutó un exércitu. Representante d'Asturies nes cortes de Cádiz nun participó na redaición de la constitución, que quedó privada de les sos opiniones favorables al sufraxu universal, la reforma del modelu colonial, la separación ilesia-estáu, la disolución de la inquisición…, too ello conforme a un pensamientu cercanu al republicanismu. En 1820 sofitó'l pronunciamientu de Riego dende'l so exiliu inglés.

---------

Pela so parte, David M. Rivas (Xixón, 1957) trabayó n'equipos d'investigación nuna docena d'universidaes d'Europa y América. Foi secretariu l'Ateneo de Madrid ente 1989 y 1995, presidente d'Amigos de la Tierra ente 1994 y 1999 y asesor técnicu del Ayuntamientu de Madrid. Ye miembru del Conseyu de Mediu Ambiente d'España, de la Unión Internacional pa la Conservación de la Naturaleza (UICN) y del Club de Roma.

Tien publicada una veintena llibros d'economía, mediu ambiente, historia y antropoloxía, y caltiénse mui activu nuna xubilación de va pocu tiempu.