Axenda Mazucu

Presentación del llibru "Cola suavidá del aire" [Poesía]

PRESENTACIÓN DEL LLIBRU
Cola suavidá del aire [Poesía]

El miércoles, 15 de marzu, a les 19:00 h., nel Salón d'Actos de la Escuela de Comerciu (Cai Francisco Tomás y Valiente, 1), l'Atenéu Obreru de Xixón y la Editorial Impronta organicen la presentación del llibru Cola suavidá del aire [Poesía], de Xosé Bolado.

Nel actu intervienen Carlos González Espina, Pablo Antón Marín Estrada y José Luis Argüelles, editor y autores de prólogu y epílogu. Darréu tendrá llugar una llectura poética.

Con esta edición de la poesía completa n'asturiano de Xosé Bolado bríndase a los llectores la posibilidá de revisitar, percorrer o somorguiase con gustu y sosiegu nel llabor vivu d'un autor universal que quixo mandase de la so llingua acorralada, por dexar lo meyor del so talentu y compromisu estéticu nes manes d'esos pocos o munchos cómplices pa los qu'escribió, cola voz amiga de los secretos perdurables, pallabres mayores y verdaderes. Equí queden, xuntos y llimpios, tolos poemes n'asturiano que conocemos de Xosé Bolado: los de los dos llibros que-y publicó Llibros del Pexe -Conxura contra la decadencia (2002) y Na estación de los relevos (2006)- y el que salió n'Impronta -La bona intención (2012)-. «Otros poemes» axunta los inéditos, o los espardíos per revistes, qu'atroparon José Luis Argüelles pa Toma de tierra (2010) y Esther Muntañola pa Un pájaro tan ligero (2021). La secuencia «cola suavidá del aire» apaez en dos poemes diferentes de Na estación de los relevos. A los editores prestó-yos rescatala pa titular el conxuntu porque-yos abultaba una bona manera de describir l'estilu que siempre gastó -pa escribir y pa vivir- el so autor.

Xosé Bolado (Uviéu, 1945 - Madrid, 2021) foi, a la so personal manera, tan discreta como eficaz, una de les personalidaes más fecundes de la cultura asturiana na vuelta del mileniu. Nes munches estayes vitales peles que se movió, dexó una buelga imborrable de compromisu, bon facer, intelixencia y sensibilidá: dende la so temprana militancia n'organizaciones polítiques antifranquistes; dende la presidencia del renacíu Atenéu Obreru de Xixón allá pelos años ochenta, onde impulsó les colecciones Deva y Tiempu de Cristal; como antólogu de poesía na so imprescindible Antoloxía poética del Resurdimientu (1989); dende'l so trabayu como profesor d'institutu; como académicu de la llingua y direutor de Lliteratura, la revista de referencia na creación n'asturiano; dende la tertulia madrileña onde llantó la so amical embaxada; como investigador y editor de la obra de Rosario Acuña… Col tiempu, el Bolado activista y promotor, l'home qu'abría y preparaba'l camín pa otros, sobre too pa los escritores nuevos, dexó-y espaciu al poeta que siempre foi: Línea imperceptible al temor (1988), Nomade (1991), Conxura contra la decadencia (2002), Na estación de los relevos (2006) y La bona intención (2012). José Luis Argüelles reservó-y un sitiu d'honor na so antoloxía Toma de tierra (2010) y Esther Muntañola tributó-y el caberu homenaxe que recibió en vida, cola publicación de l'antoloxía billingüe Un pájaro tan ligero (2021). Cola suavidá del aire quier dexar la so impronta perdurable nos llectores de güei y de siempre.