viernes 21 de abril de 2023 - 17h
LA ESPIRCHA La Semiente 21 y 22 d'Abril
TORNA LA ESPIRCHA DE LA SEMIENTE!! 21 y 22 d'Abril.
Pa festexar que llevamos 12 años resistiendo, y amás col cometíu de sacar perres pa la Foguera de San Xuán d'esti añu, que caí de vienres y vamos entamala!
Acutai la fecha, pronto damos más información.
Dexamosvos parte del testu esplicativu d'otros años alrodiu les espiches na cuenca'l Nalón_
"Anguaño'l términu espicha yá nun s'utiliza namás pa falar de les celebraciones que se faen nos llagares cuando la sidra ta pa corchar y ábrese o espíchase una pipa o un tonel pa beber d'éllos y comer depies alredor d'una mesa los productos típicos de la espicha. Non. Anguaño y, por motivos comerciales unes veces y por evolución del llinguaxe otres, llámase-y espicha a cualquier pinchéu, yá sía de sidra corchao, vino o lo que sía. Anguaño tamién llamen espiches a grandes cenes d'empresa o de compañeros y amigos onde se comparten raciones. Mui conocíes son les espiches que los estudiantes de distintes facultaes universitaries entamen dacuando y que nun son otru que grandes fiestes con bébora blanco y música electrónica unes veces, o otres, grandes quedaes pa beber albentestate, lo que suel llamase-y botellón. Esti últimu usu de la palabra espicha foi incorporáu yá a les fiestes de facultaes fora de Asturies, siendo anguaño más famoses yá les entamaes pol alumnáu de la Universidá de Llión qu'el de la Universidá d'Uviéu.
El términu espicha nun ye otru que espita o dúcil, y fai referencia a la espicha que se pon al tonel o a la pipa per onde va salir la bébora. La variante llocal del términu espicha na cuenca del Nalón ye espircha y, anque ta cayendo en desusu y delles persones equivocadamente piensen que ye un vulgarismu, trátase de la palabra patrimonial de la zona y nel subconsciente colectivu ta amestada a muncho más qu'un pinchéu o una cena.
Amás de les tradicionales espirches nos llagares grandes o medianos, siempre esistieron les espirches caseres, les de los pueblos, les de los barrios, les de les asociaciones…
De normal ,yera y ye, bien común qu'asociaciones de vecinos, parroquiales, de festeyos deportives o culturales entamaren esti tipu de celebraciones, yá non yá como actividá social, lúdica, festiva y gastronómica, sinón tamién como forma d'autoxestión económica pa dempués faer otres coses.
Esti tipu d'espirches pequeñes, con menor fortuna que fai unos años, celébrense nos conceyos del valle del Nalón tradicionalmente ente los meses de marzu, abril y mayu, y nelles ye típico comer conceyales (pinchu de bacalláu), tortiella, llacón, empanada, güevos cocíos, bígaros, centolles, andariques, chorizu, quesu…. Al contrariu que'n delles espiches de llagares grandes, equí nun se va a preciu zarráu nin barra llibre de comida y sidra. Non, lo que se fai ye pagar cada consumición: los pinchos despachense por unidaes y la sidra tamién; nun se bebe enllenando'l vasu de la pipa, lo que se fai ye enllenar les botelles de la pipa y vendeles según el veceru pida.
La Semiente quixímos realizar esta Espircha añal yá non namás como forma d'autoxestión del centru social y les actividades que faemos, nin simplemente como celebración del aniversariu nuestru, sinón pa reivindicar una forma de socializar que ta perdiéndose, pa revitalizar una actividá que puquiñin a puquiñin va desvirtuándose o de la cual el so nome y la so razón de ser tán quedando soterraos embaxo los nuevos usos de la palabra, yá sían pincheos, botellones o simples cenes d'empresa. Dende La Semiente queremos reivindicar la sidra nuevo, la primavera, los productos de la tierra, la música tradicional, los cantares de chigre, la socialización y l'autoxestión como daqué que siempre tuvo na nuestra cultura y que nun tien que perdese. Y sobremanera, queremos reivindicar la variante local de la palabra, ESPIRCHA, pa espeyar, amás de too esto, esi tastu especial que tienen les celebraes nel Nalón, y como non, tamién como cuñu calidá y identidá local."
Evento de La Semiente
