sábado 16 de septiembre de 2023 - 19h
Muyer Vida Llibertá. Concentración en Xixón.
Derechos Humanos plenos. Pa toos, pa toes. En tolos países.
Va xustamente un añu asocedió n'Irán un acontecimientu imprevistu qu'abrió les puertes a un escenariu políticu nuevu nesi país. La muerte de Jina Mahsa Aminí, una moza kurda de 22 años, depués de detenela la Policía de la Moral acusada de nun vistir correctamente. Una espresión qu'escuende la obligatoriedá n'Irán pa les muyeres de sometese a determinaes normes qu'afecten a tola so vida, empezando pela obligación de vistir d'una forma determinada.
A pesar de que la versión oficial del Gobiernu iranín falare d'un infartu cardiacu, la so familia fixo pública la denuncia del so asesinatu, lo que desencadenó una montonera de protestes nes que participaron milenta persones, les más d'elles moces, que reclamaben la necesidá de cambeos urxentes pa Irán, empezando pel ordenamientu llegal existente na República Islámica, que condiciona cualquier actividá política, social y individual al respetu previu d'unes normes relixoses claramente opresives que nun encaxen colos valores de respetu a les llibertaes individuales.
Al glayíu de "Muyer, Vida, Llibertá" millones de persones salieron a les cais de tol mundu pa reclamar esos mesmos derechos y solidarizase al empar coles muyeres iranines. Esti glayíu, acuñáu pol Movimientu de Muyeres Kurdes va más de 30 años, ta valiendo pa ufiertar una esperanza de lliberación, personal y social, nun contestu rexonal onde apoderen tendencies autoritaries y de fanatismu relixosu. Valió pa empoderar a les muyeres kurdes de Turquía de cara a garantizar el so protagonismu nos cambeos sociales y políticos que precisa esi país. Ta valiendo pa movilizar a les muyeres de Rojava (parte de Kurdistán en Siria) p'afalar la resistencia al avance del Estáu Islámicu (ISIS). N'Irán, el réxime de les autoridaes relixoses entendió desiguida'l peligru que s'escuende tres d'esi eslogan, y reprimió masiva y indiscriminadamente a quien protestaben nes cais.
El resultáu de too esto foi la detención de dellos miles de persones, les más d'elles moces y muyeres. La República Islámica defendióse disparando abiertamente contra les y los manifestantes, entamando simulacros de xuicios onde s'imponen condenes de decenes d'años de cárcel, prendiendo a familiares de los y les manifestantes cola mira d'aislar de la sociedá a quien s'atopen nes cárceles. Lo más tarrecible ye que s'aplicaron delles sentencies de muerte por aforcamientu.
Al cumplise'l primer aniversariu d'estes protestes, la nuestra conciencia de ciudadanía esíxenos salir a les cais pa recordar les víctimes de la opresión, a dicir alto y claro que les llibertaes individuales formen parte de la nuestra idea de sociedá igualitaria ente homes y muyeres, a condergar l'aplicación de polítiques represives, incluyendo la pena de muerte como arma pa meter mieu al conxuntu de la sociedá.
Los Derechos Humanos son el nuestru horizonte y son derechos inalienables, pa homes y muyeres de cualquier parte del mundu. La llucha pa garantizar la so vixencia llámanos a movenos solidariamente.
Asturies, setiembre 2023
Concentración: Sábadu 16 de setiembre. A les 7 de la tarde.
Sitiu: Plaza del Parchís, Xixón.
Origen : mensaje recibido el 11 septiembre 07h