sábado 23 de septiembre de 2023 - 18h
Presentación de la traducción al asturianu de "Guillem"
El sábadu 23 de setiembre tarán na xusticia Rafa y Miguel presentando "Guillem". Porque nin escaecemos nin perdonamos, seguimos na llucha. ¡Facismu nunca más!
Núria Cadenes: «Guillem». Ediciones Trabe, 2022 (versión asturiana de Miguel Sánchez Canella).
«(…) y el xugador, dempués de ver la tarxeta colorada, tien qu'abandonar el campu. L'árbitru indíca-y el túnel de vestuarios y el delanteru, con pasu sele y figura arrecha, acércase, primero de salir pa fuera, al bancu visitante, onde'l so entrenador y los sos compañeros miren pa él. Fai una posa y, ente'l runfíu de l'afición llocal, nun ye quien pa diferenciar unes pallabres con otres. Xiblíos, protestes, glayíos. Ye lo avezao (…)».
Nel añu 1993 Guillem Agulló i Salvador, un mozu valencianu de dieciocho años, foi asesináu por un grupu de fascistes nel llugar de Montanejos. Los criminales, venceyaos a organizaciones nazis, garráronlu nuna plaza pública y mentantu taba acorraláu, ún d'ellos, Pedro José Cuevas Silvestre (Ventosa), metió-y una puñalada que terminó cola so vida. La razón pa matalu yera ser un conocíu antirracista y independentista de la contorna. Y sabíenlo, sabíen que Guillem nun-yos tenía mieu. Y eso, esa falta de medrana, ye lo que-yos engafentaba por demás. Ye lo que'l so odiu nun podía consentir enxamás. Yera'l momentu afayadízu pa terminar con dalguién que nun los temía. Porque Guillem facía frente al fascismu.
Si tuviéremos que clasificar esti llibru en dalguna categoría, sería la de novela documental. Porque en «Guillem» nun hai personaxes de ficción, y tampoco nun ye una historia inventada, que nunca nun pasara na vida real. Cuéntanos la historia d'un asesinatu, de la muerte d'un rapaz, d'una vida que nun surdió de la pluma de naide. Esistió y foi real, y eso ye lo que Núria Cadenes contruye de manera cronóloxica, arrancando bien ceo nel momentu en que Guillem fora asesináu, namás faciendo un recordatoriu de momentos primeros, pa darréu metese nel desendolcu importante de la novela. Porque lo que l'autora catalana quier rescamplar ye l'odiu, la conciencia del fechu de matar a Guillem por ser quien yera. Y ye bien pronto cuando topamos col asesinatu, y con tolo que dempués traxo consigo
