Axenda Mazucu

El celtismu del Sieglu XXI.De la reivindicación de los oríxenes al horizonte...

CONFERENCIA D'ÁSTURA DEL MARTES 20 DE FEBRERU:
"EL CELTISMU DEL SIEGLU XXI. De la reivindicación de los oríxenes al horizonte creador del interceltismu", por LISARDO LOMBARDÍA.
Lisardo Lombardía ta anguaño enfotáu na reflexón sobre la trescendencia del componente célticu nel nuesu patrimoniu cultural y la nuesa identidá, convencíu de qu'esta dimensión cultural -mui alloñada d'un etnicismu esencialista- ye un elementu imprescindible del futuru d'Asturies. Va falanos de tou ello na conferencia d'esti mes.
-----------------------------------
Atenéu Obreru de Xixón
Antigua Escuela Comerciu, 2ª planta
19:00 hores
-----------------------------------
La cultura celta reapaez na historia como poco dende entamos del sieglu XIX. El romanticismu xuega un papel mayor nel espardimientu de la importancia de esa cultura antigua, sobre manera dende la obra "Los Poemes d'Ossian" del escritor escocés James Mc Pherson (1765) y na Bretaña Armoricana cola esencial antoloxía de cancios populares "Barzaz Breizh" (1839) del vizconde Théodore Hersart de la Villemarqué. El mesmu Lisardo Lombardía espublizó na revista Cultures l'ensayu "L'interceltismu musical: una construcción bretona. Del "Barzaz Breizh" al "Festival Intercélticu de Lorient" (2018). Los celtes, les sos llingües -hasta entós arrequexaes- y la so cultura, algamen un puxu de gran potencia ideolóxica que va a encadarmar bien d'identidaes n'Europa, sobre manera nel arcu Atlánticu.
Nel sieglu XX la evolución de l'arqueoloxía, y los estudios etno-hestóricos y llinguísticos permitieron un analís fondu d'esti pueblu y la so hipotética herencia cultural, siendo a estremar lo que yera artificiu y "celtomanía" de les sos ayalgues y auténtiques aportaciones culturales n'abondos casos inda rastrexables y vixentes.
El debate sobre'l celtismu sigue abiertu y cuido que lo será por bien d'años, porque'l celtismu nun solo foi a inxertase nel imaxinariu coleutivu de munchos pueblos que reivindiquen la so herencia na cadarma de la so identidá, sinon que, amás, convirtióse nun elementu d'altor pa la creación artística de toa mena. Nesa nueva realidá, ye l'interceltismu, l'intercambiu ente los países qu'afiten el so raigañu celta, un elementu fundamental na creación contemporánea, non solo na música, sinon na lliteratura y nel arte d'anguaño.
L'Interceltismu y la so espresión creadora ye l'espeyu d'un celtismu que refugó dende'l principiu tou etnicismu esencialista pa camudar nun referente de creación cultural llibre y abierta cola identidá como aniciu y l'humanismu como horizonte. Esa ye la realidá y el retu del Celtismu del sieglu XXI.
------
LISARDO LOMBRADÍA
Diplomáu en Medicina y Ciruxía pola Universidá d'Uviéu, exerció como médicu de familia per dellos años. Averáu dende mozu a la cultura asturiana en xeneral y a la música en particular, formóse en musica clásica nel Coru Universitariu d'Uviéu.
Trayeutoria
En 1983, foi ún de los fundadores del coleutivu d'estudios etnográficos Belenos, que preside. La so Fundación publica la prestixosa revista «Asturies, memoria encesa d'un país» y entama esposiciones y seminarios monográficos. Investigador etnográficu y escritor n'español y n'asturianu, ún de los sos testos, Andolina, escrita pal grupu de folk Tejedor, foi escoyíu como finalista del premiu 2004 de l'Academia de la música española. Foi tamién el creador y direutor artísticu de les Nueches Celtes d'Uviéu, del Festival de l'Arpa Celta y del Festival Uviéu Folk, los trés desenvueltos na capital asturiana pelos años 80-90.
En 1987, creó una nueva empresa discográfica, Fonoastur, y empecipió un trabayu intensivu de grabación y de distribución de música. Produz más de 150 discos y fae remanecer nomes como Beleño, Llan de Cubel, Xuacu Amieva, Mariluz Cristóbal Caunedo, Muyeres, Ramón Prada, munches bandes de gaites, coros… Tamién realizó trabayos de direición escénica y musical, y formó parte d'equipos de producción de videu.
En 1988, el diariu La Nueva España pidió-y empobinar un centru cultural venceyáu al periódicu. Dirixó dende entós el Club Prensa Asturiana, un foru ineludible qu'atropó cada añu a más de 25 000 persones n'actos onde daba voz a personaxes d'altor nacional ya internacional, y mesmamente a les asociaciones llocales que participen na vida cotidiana d'Uviéu y d'Asturies.
Perbon conocedor de la Bretaña y de los países celtes, Lisardo Lombardía foi dende 1985 el delegáu del Festival Intercélticu p'Asturies y convirtióse nel so direutor xeneral ente 2007 y 2021, añu en que torna a Asturies.
Nestos años trabayó pol afitamientu profesional del Festival y el rellanzamientu de los llazos coles asociaciones bretones. Defensor del valir de les cultures minoritaries y d'una visión cosmopolita del interceltismu, consiguió enanchar la posición de los países celtes menos visibles nel Festival y l'apertura a les diáspores del mundu célticu y los sos mestizaxes contemporáneos, tamién dio una mayor visibilidá a la llingua y la cultura bretones.
Reconocencies
En 2009 ye nomáu miembru del Conseyu Cultural de Bretaña, organismu oficial únicu nel so xéneru.
En 2015 recibió la medaya de plata del Principáu d'Asturies.
En 2021 recibió les medayes de la ciudá de Lorient y del Institutu Cultural de Bretaña. Finalmente el Ministeriu de Cultura de la República Francesa otorgó-y el nomamientu de «Chevalier de l'Ordre des Arts et des Lettres».
En 2022 ye nomáu académicu d'honor de l'Academia de la Llingua Asturiana y recibe l'Urogallu especial del Centru Asturianu de Madrid.