Axenda Mazucu

Actu conmemorativo del llevantamientu del 25 de Mayu

OTRU 25 DE MAYU. PERO ESTA VEZ NUN YE LO MESMO

Lo que pasó en mayu de 1808 n'Asturies foi una revolución: polos sos métodos, subversivos anque tiñíos de llegalismu, y porque dende esi momentu nada volvió ser igual.
Resulta curioso qu'Asturies entrara na dómina contemporanea dueña del so destín y que décades dempués quedara sumida nel Estáu centralista y uniformizador que construyó'l lliberalismu moderáu, como tamién resulta llamativo que'l mayu asturianu fuera darréu incluyíu na tradición historiográfica nacionalista española como un episodiu más del papel axudicáu a Asturies: el de la fiera dormida, el de la comunidá eternamente insumisa.

Esti añu ye otra bona ocasión para recordar cómo yera l'Asturies de 1808, como tamién lo ye pa ser conscientes de lo que ye capaz un pueblu cuando ta xuníu en pos d'un oxetivu común. En 1808 Asturies entamó en solitariu una guerra escontra la gran potencia del momentu. ¿Nun ye eso dignu d'alcordanza y almiración?

Entá más. Esti mesmu sábadu 25 de mayu va cellebrase l'asamblea constituyente d'un movimientu ciudadanu tresversal, seriu, que nun renuncia a lo que somos y que va trabayar por construyir un futuru dende la identidá y los demás valores del nuestru pueblu. Podéis lleer el manifiestu, coles llinies xenerales del movimientu, na web https://25demayu.com/manifiestu/
----------------
Esti testu básase en gran parte n'otru del historiador Faustino Zapico, espublizáu en 2008, nel 200 aniversariu del llevantamientu d'Asturies contra la Francia de Napoleón.