jueves 30 de mayo de 2024 - 19h
Presentación del llibru "Los tordos", de Vicente García Oliva
PRESENTACIÓN DE LLIBRU
Los tordos
El xueves 30 de mayu, a les 19H.00', nel llocal social del Atenéu Obreru de Xixón (Cai Francisco Tomás y Valiente, 1-2ª Planta), presentarase el llibru Los tordos, de Vicente García Oliva, editáu por Hoja de Lata.
La presentación correrá a cargu de Marta Mori y contará cola presencia del autor.
La década asitiada ente los años 1930 y 1940 fue n'España un periodu de gran importancia histórica, pero n'Asturies fue una época que quedó grabada a sangre y fueu nel maxín de los asturianos. Fue, quiciás, xunto colos años de la Monarquía Asturiana y la Declaración de Guerra a los franceses un de los tres acontecimientos cimeros na Historia del nuestru País. Poro, anque los fechos asocedíos nesa década son mayormente conocíos, ye claro que'n cada pueblu, en cada ciudá, en cada valle de la nuestra xeografía hubo unes particularidaes propies dacuando desconocíes. Esta novela narra cómo se vivieron aquellos diez años nun pueblu (ficticiu), que nun llegó a tar na vanguardia de los socesos, pero al que llegaron ñidios los ecos y les consecuencies de los mésmos. De la xente qu'ellí vivía, de los sos pruyimientos y esmoliciones, y del mou d'afrontar aquellos fechos, ye de lo que nos fala l'autor. Al tiempu, ye quien a pone-y voz a un de los personaxes más carismáticos d'aquellos años y que quiciás ye'l gran desconocíu pa los sos compatriotes: Higinio Carrocera, el llamáu "Héroe del Mazucu", qu'algamó la másima distinción de la República, la Medalla de la Libertad. De la conxunción d'estes dos histories, la del pueblu de Castañera Alta y la de "Ginio", surde esti llibru que ye, al tiempu, amenu y terrible, como terrible fue aquella década onde naufragaron los suaños de munchos asturianos.
Vicente García Oliva nació en Xixón (Asturies), ciudá na que vive actualmente. Escritor n'asturianu y castellán tien más d'una trentena de llibros publicaos. Conocíu pola so dedicación a la Lliteratura Infantil y Xuvenil, cultiva tamién la novela p'adultos, l'ensayu y la investigación. Ganador de numberosos premios, puen destacase d'ente ellos el María Xosefa Canellada ("Fontenebrosa: El fin"); el Fuertes Acevedo d'Ensayu ("El síndrome de Scherezade"); el de la Crítica d'Asturies en dos ocasiones ("Garulla" y "La vida de siempre"); el Fernández Lema ("Ella") o'l Montesín ("Fontenebrosa II: la rebelión de los Homosaurios"). Y en castellán el Premio de Guión Pilar Miró, de la Academia de las Artes de Televisión, por "A simple vista" o el de la Comisión Católica Española para la Infancia (CCEI) por "Las aventuras de Inés Saldaña y de cómo ayudó a Colón a descubrir América". Ye miembru de l'Academia de la Llingua Asturiana y de la Sociedad General de Autores y Editores (SGAE).
Marta Mori (Xixón, 1965) ye profesora, crítica lliteraria, traductora y escritora. Ente les publicaciones d'ella más recientes tán el volume d'ensayos "Notes de lliteratura asturiana", el poemariu Los carreros del tiempu (premiu Xuan María Acebal 2022) y la traducción al asturianu de la novela Cacofonía, de l'autora senegalesa Ken Bugul. Ye miembru de númberu de l'Academia de la Llingua y directora de la revista Lliteratura.
