Axenda Mazucu

"De la prehistoria a la Edá Media al traviés de diez pieces del museu arquelóxico..."

CONFERENCIA D'ÁSTURA DEL MARTES 12 DE PAYARES: "DE LA PREHISTORIA A LA EDÁ MEDIA AL TRAVIÉS DE DIEZ PIECES DEL MUSÉU ARQUEOLÓXICU D'ASTURIES", por María Antonia Pedregal, direutora del MAA.
-----------------
Atenéu Obreru de Xixón
Antigua Escuela de Comerciu, 2ª planta
Cai Tomás Zarracina, xunto al Parchís.
Martes 12 de payares, 19:00 hores
-----------------
El Muséu Arqueolóxicu d'Asturies ye la institución de referencia pa conocer el patrimoniu arqueolóxicu asturianu. Atópase allugáu nun edificiu de gran simbolismu na hjstoria de la ciudá d'Uviéu, l'antiguu monesteriu de San Vicente, del que se caltien un claustru góticu-renacentista del sieglu XVI. Les modernes instalaciones museográfiques distribúyense per tres plantes, nes que ye posible contemplar les más de 2000 pieces espuestes, testimoniu de la evolución de la Historia d'Asturies dende la llegada de los primeros pobladores hai unos 300 000 años hasta los entamos de la Edá Moderna.
Ferramientes prehistóriques, oxetos d'arte mueble paleolíticu, testimonios de la minería del cobre d'hai 5000 años, tol repertoriu material atopáu nos castros de la Edá del Fierro, la conquista romana, la esplotación del oru, l'Antigüedá Tardía y la coleición de pieces d'Arte Asturianu altumedieval constitúin un conxuntu únicu.
Tres d'una curtia introducción tocante a la historia del Muséu Arqueolóxicu d'Asturies y de la conformanza de la so coleición, vamos analizar dalgunes de les obres más representatives de la esposición permanente: obres maestres del arte mueble prehistóricu como'l colgante en forma de cabeza de cabra de la cueva de El Pozu'l Ramu, los misteriosos picos asturienses, les primeres amueses d'orfebrería antigua, el trabayu perduru de los mineros qu'estrayíen cobre hai más de 3000 años, espades y cascos de guerreros de la Edá del Bronce, los apocayá apaecíos torques de Cavandi, les esteles funeraries vadinienses y pieces representatives del Arte Asturianu y de la coleición medieval.
Un repasu a la Historia d'Asturies pente medies de dalgunos de los resclavos materiales más importantes del patrimoniu arqueolóxicu asturianu, oxetos que nos proporcionen información sobre'l nuestru pasáu y sobre aquellos qu'habitaron Asturies enantes de nós.
------------
MARÍA ANTONIA PEDREGAL.
Llicenciada n'Historia pola Universidá d'Uviéu, especializada na Historia medieval d'Asturies, ye profesora d'Educación Secundaria. Mientres los estudios universitarios, afayó otros dos campos nos que se formó y al rodiu de los que desarrollaría la so carrera profesional: l'arqueoloxía y la llingua asturiana.
Asina, participó en venti campañes d'escavación arqueolóxica en diez yacimientos diferentes tanto n'Asturies como n´otres partes d'España (Toledo, Badajoz y A Coruña) ya Italia (Sicilia, Livorno y Como). Yacimientos que presenten tipoloxíes variaes: asentamientos fortificaos, llugares d'habitación, ilesies, necrópolis, un castiellu o un faru, d'un arco temporal ampliu, pues correspuenden a dómines romana, visigoda, andalusí, ostrogoda, normanda y medieval.
Frutu del so trabayu investigador son una trentena de llibros y artículos espublizaos en diverses revistes qu'abarquen dende la temática arqueolóxica, histórica o etnográfica a la toponimia o la trescripción de documentación medieval. Amás, cuenta con dos obres traducíes del italianu al asturianu:
• Llibru de les Maravíes del Mundu de Marco Polo. Publicaciones Ámbitu S.L. Uviéu, 1996
• La palabra final. Diariu d'un suicidiu de Roberta Tatafiore. Trabe. Uviéu, 2021, Premiu Florina Alías a la meyor traducción al asturianu del año 2021
Llaboralmente, amás de contar con esperiencia docente de más de 16 años enseñando Xeografía, Historia ya Historia l'Arte en Secundaria y Bachilleratu, ocupó la Xefatura de Serviciu de Política Llingüística de la Conseyería de Cultura per más de cinco años y, angüañu, la Dirección del Muséu Arqueolóxicu d'Asturies dende marzu de 2021. Nestos tres años llargos al frente d'esta institución cultural, ta desarrollando un programa d'actividaes col envís d'esparder la conocencia del ricu patrimoniu arqueolóxicu asturianu, cola organización d'esposiciones temporales, visites guiaes, ciclos de conferencies, talleres pa públicu infantil y adultu, publicaciones y diversos eventos en collaboración con otres entidaes ya instituciones.
-----------
© Semeyes de pieces: Juanjo Arrojo Martinez.