Axenda Mazucu

Conferencia "Caminos y pelgrinos n'Asturies del Sieglu VII AL XXI"

CONFERENCIA D'ÁSTURA'L MARTES 10 D'AVIENTU:
"CAMINOS Y PELEGRINOS N'ASTURIES DEL SIEGLU VIII AL XXI", por Víctor Guerra García, investigador y escritor, espertu en camineríes y pelegrinaciones.
-----------------
Atenéu Obreru de Xixón
Antigua Escuela de Comerciu, 2ª planta
Cai Tomás Zarracina, xunto al Parchís.
Martes 10 d'avientu, 19:00 hores
-----------------
La historiografía asturiana sobre les pelegrinaciones relixoses foi tradicionalmente narrada dende la perspeutiva canónica de la Ilesia y los enfoques convencionales de los historiadores. Esiste un movimientu civil y relixosu que, nel so enfotu por construyir un rellatu hexemónicu, escaeció dafechu numberosos matices y aspeutos fundamentales.
Nesta conferencia proponemos esclariar eses primeres pelegrinaciones relixoses escontra San Salvador d'Uviéu ente los sieglos VII y X, asina como averanos a les que -amás de la visita a San Salvador y les Reliquies Santes-, naguaben por asitiase nel centru de la constructio imperii d'Alfonsu II, fenómenu que non solo afitó un espaciu sacru, sinón que tamién empató una xunión simbólica ente lo político y lo espiritual nos Caminos del Reinu.
Cola invención del sepulcru de Santiago, l'escenariu de les pelegrinaciones asturianes esperimenta un tresformamientu. Los Caminos al Salvador, cuantayá protagonistes, pasen a integrase nuna rede mayor colonizada polos pelegrinos que, en rindiendo homenaxe al Señor n'Uviéu, continúen camín escontra Compostela, pa rindir cultu al Siervu. Dambes pelegrinaciones traen una cosmovisión ritual propia que remanez a la d'echase a los caminos.
Vamos tamién afondar nes claves de dambes tradiciones pelegrines n'Asturies, los sos oríxenes, los sos finxos y les diferencies que definen les sos respeutives identidaes, porque entender los Caminos nun ye solo percorrelos, sinón tamién lleer nellos los resclavos d'una hestoria compartida ente la fe, la política y el deséu humanu de trescendencia.
---------
VÍCTOR GUERRA (Tremañes, 1955) ye un autor d'amplios rexistros, pero ún de los que marcó fondamente la so trayeutoria ye la caminería, un ámbitu al que dedicó años de llabor profesional y pasión personal. El so trabayu toma dende percorrer cañaes reales y esplorar antigües rutes treshumantes y tresterminantes, hasta entamar y desenvolver proyeutos de redes de siendes, tanto pa caminantes como pa ciclistes de monte. Esti compromisu colos caminos vencéyase con un constante llabor d'investigación qu'arriquez la so aportación a esti campu.
Quiciabes el gran públicu nun recuerde que foi Víctor Guerra'l creador de proyeutos emblemáticos como l'actual Sienda l'Osu, nos valles del Trubia, o de redes pioneres de ciclomontañismu en L.lena, la Montaña Central d'Asturies y les siendes costeres asturianes.
Nos últimos años, el so interés centróse especialmente nos Caminos Pelegrinos d'Asturies, un campu onde amesta la so esperiencia como creador de rutes con un minuciosu llabor investigador. Esti nuevu enfoque anueva'l so compromisu cola hestoria, la cultura y l'espíritu de los caminos.
Ente 2015 y 2023 espublizó diez rellatos sobre Caminos pelegrinos n'Asturies, Cantabria, Lleón y Portugal, ente los que sobresal "Por la Ruta de las Reliquias y el Camino Olvidado rumbo a Santiago (2015)".
Y sobre caminos y camineríes, senderismu, guíes ya itinerarios en bicicleta de monte tien publicaos dende 1992 a 2024 otros 6 llibros ente los que destaca l'editáu esti mesmu añu "Viajeros de Bordón por el Camino Primitivo" cola Editorial Sapere Aude.
Edita tamién el blogue d'investigación "Asturias Peregrina y Caminera", y el de viaxes "Vereda de Heterodoxos/Gente del Bordón". Y caltien la páxina web "Mis Caminos a Covadonga".
Ye collaborador habitual del programa de la RPA "Un buen día para viajar" y d'otros medios de comunicación, prensa y radio asturianes y revistes españoles en temes de senderismu, rutes BTT, ciclismu urbanu y cicloturismu. Collabora cola Nueva España dende fae 16 años.
Autor de numberosos proyeutos, cartafueyos, trabayos d'abalizamientu rellacionaos con estes actividaes pa instituciones y organismos diversos n'Asturies, Sierra Nevada, Lleón, La Rioxa… y Madrid, al traviés de la consultora Sepinum.