Axenda Mazucu

Conferencia: "Usando la llingua:Retos de comunicar n'asturianu nel Sieglu XXI"

CONFERENCIA D'ÁSTURA'L MARTES 11 DE FEBRERU:

"USANDO LA LLINGUA: RETOS DE COMUNICAR N'ASTURIANU NEL SIEGLU XXI", por Arantxa Margolles Beran, historiadora, comunicadora y ensayista, esperta n'hemerografía y xenealoxía.

-----------------

Atenéu Obreru de Xixón

Antigua Escuela de Comerciu, 2ª planta

Cai Tomás Zarracina, xunto al Parchís.

Martes 11 de febreru, 19:00 hores

-----------------

Los retos de la divulgación y difusión de conteníos nel sieglu XXI requieren un enfoque multidisciplinar nel que nun solo se planteguen téuniques comunicatives, sinon tamién teunolóxiques, que munches vegaes escapen de la comprensión del públicu xeneral.

Cuando esta xera, amás, quier facese n'asturianu, un idioma qu'entá encarez del estatus d'oficialidá, fáese tovía más abegosa. Por embargu, una llarga triba d'iniciatives tan surdiendo nos caberos años y son bien acoyíes pol públicu nun solo asturianista sinon tamién xeneral: espublizaciones, rutes, visites guiaes, xeneración de conteníu audiovisual amuesen qu'esiste un interés claru n'Asturies y fuera d'ella, pudiendo ser clave pa que'l enriquecimientu cultural vaya de la mano del económicu n'estayes como'l turismu o la educación.

¿Qué ye, entós, lo que mos falta? Nesta conferencia de la historiadora y comunicadora Arantxa Margolles (responsable de Cróniques Ocultes en PlayPresta; de la teatralización de Xosefa Xovellanos cola collaboración de la Oficina de Normalización Llingüística de Xixón y autora de dellos ensayos históricos n'asturianu) van analizase dalgunes de les iniciatives caberes de comunicación y divulgación nel idioma del país, y tamién plantegase les dificultaes qu'estes atopen a la hora d'alcontrar cabida na radiotelevisión pública, nos medios de comunicación tradicionales y nes nueves formes de llegar a la reciella y a les xeneraciones más moces d'Asturies.

----------

ARANTXA MARGOLLES (Xixón, 1982) ye historiadora pola Universidá d'Uviéu y posgraduada n'Arqueoloxía y Patrimoniu pola Universidá Autónoma de Madrid. Especializada en divulgación histórica, n'hemerografía y xenealoxía, collabora en dellos medios de comunicación asturianos y na empresa cultural Cuéntame un cuadro.

Responsable de la seición 'Viejo Gijón' nel diariu El Comercio, tien collaborao nes obres conmemoratives de la XLII, XLIV y XLV Selmana de les Lletres Asturianes, y na TPA guionizó y presentó'l programa 'Historias y Misterios' mentres los años 2017-2018.

• Primer y segundu premiu, respeutivamente, nel concursu d'oratoria 'Xixón fala en 3' en 2021 y 2022.

• Da vida a Xosefa Xovellanos en collaboración cola Oficina de Normalización Llingüística de Xixón.

• En 2024 foi premiu 'Mirada Violeta' d'esi añu na estaya de Comunicación y Divulgación pol so compromisu cola perspeutiva de xéneru dientro de la Historia.

• Collabora como comunicadora nes 'Cróniques Ocultes' de PlayPresta; copresentó'l programa de radio 'Sentir Asturies' (RPA) y ye responsable de delles guíes na empresa Xixón Tours.

• Ta acabante d'espublizar l'ensayu 'Fuimos granos d'arena. La solidaridá n'Asturies énte'l Desastre d'Annual' (Ed. Trabe, 2024).