Axenda Mazucu

Conferencia: "Recursos alimentarios nel Reinu d'Asturies(Sieglos IX y X)"

CONFERENCIA D'ÁSTURA'L MARTES 8 D'ABRIL:
"RECURSOS ALIMENTARIOS NEL REINU D'ASTURIES (sieglos IX y X)", por Amalia Trancho Menéndez, historiadora pola Universidá d'Uviéu, máster n'Historia Antigua y Medieval d'Europa pola Universidá de Cantabria y especialista en recursos, costumes y usos alimentarios na alta Edá Media asturiana.
-----------------
Atenéu Obreru de Xixón
Antigua Escuela de Comerciu, 2ª planta
Cai Tomás Zarracina, xunto al Parchís.
Martes 8 d'abril, 19:00 hores
-----------------
La conferencia del mes d'abril va tratar de los recursos alimentarios de que dispunxeron los asturianos que vivieron nesti territoriu ente los sieglos IX y X, xustamente nel tiempu que conocemos como'l Reinu d'Asturies.

Trataremos d'amosar, a traviés de l'atenta llectura d'ocho documentos del periodu, la producción y el consumu como fautores indisolubles de l'alimentación, y cómo los vezos alimenticios dependieron, en gran midía, de les coyuntures económiques, talo que socederá nel restu d'Europa. Tamién nos averaremos a los destinatarios de la producción na estensa xeografía asturiana, marcando les diferencies territoriales -oriente u occidente, montaña, valle o costa- asina como'l perfil social d'accesu a los productos más nutritivos y, sobre too, la evolución de l'alimentación nos distintos estamentos nel tiempu que nos ocupa.

Con esti propósitu orientamos esta conferencia que, a falta de certeces, tien más d'indicios razonaos y razonables que de conclusiones definitives, pues esti análisis ye más un intentu d'aproximación qu'un estudiu zarráu, que pudiere servir de base a futures investigaciones qu'incorporaren fontes arqueolóxiques ya iconográfiques.
-------
AMALIA TRANCHO MENÉNDEZ ye llicenciada n'Historia pola Universidá d'Uviéu y máster n'Historia Antigua y Medieval d'Europa pola Universidá de Cantabria. De vuelta a la Universidá d'Uviéu completó'l Programa de Doctoráu n'Investigaciones Humanístiques centrándose nel estudiu ya investigación de los recursos, les costumes y los usos alimentarios qu'hubo n'Asturies, a lo llargo de la mui estensa Edá Media; proyeutu, ya fuera del ámbitu académicu, nel que continúa trabayando.
Sobre esta materia participó con ponencies y comunicaciones en congresos y conferencies de distintes universidades. Cuenta con artículos y capítulos sobre la cuestión en diversos medios especializaos.

Otra de les llinies d'estudiu ye'l cristianismu primitivu, con una reciente publicación, Magia y Cristianismo en la Antigüedad tardía (Ed. Trea, 2024), onde investiga'l pasu de la maxa pagana al cristianismu incipiente a partir del poema de Cipriano y Justina, temática sobre la que tien asoleyaes varies collaboraciones n'asturianu y castellán. Sobre esti tema coordinó'l ciclu de conferencies La génesis del cristianismo en Asturias.

N'actualidá trabaya como coautora nuna obra de divulgación empobinada al públicu mozu, sobre l'usu del poder qu'exercieron muyeres asturianes a lo llargo la Historia.