Axenda Mazucu

"Lucus Asturum:Arqueoloxía y memoria d'una civitas romana nel centru d'Asturies"

CONFERENCIA

LUCUS ASTURUM

Arqueoloxía y memoria d'una civitas romana nel centru d'Asturies

El martes 10 de xunu, a les 19H.00', nel llocal social del Atenéu Obreru de Xixón (Cai Francisco Tomás y Valiente, 1 - 2ª Planta), Ástura organiza la conferencia LUCUS ASTURUM. Arqueoloxía y memoria d'una civitas romana nel centru d'Asturies , a cargu de Esperanza Martín, arqueóloga directora de Lucus Asturum.

Esta actividá mensual en torno a la promoción de la cultura asturiana ye una collaboración ente les entidaes Atenéu Obreru de Xixón y ÁSTURA.

Ástura quier zarrar esti oncenu cursu de conferencies asturianes cola participación d'Esperanza Martín, l'arqueóloga direutora dende 2015 de les nueves escavaciones en Lucus Asturum, la supuesta civitas romana de Ptolomeo, anque tou apunta a un vicus viarii (un asentamientu venceyáu a un nuedu de comunicaciones del Imperiu Romanu) averáu a un importante centru de cultu de la Asturia tresmontana. Bien suxerente ye'l nome otorgáu polos romanos a esta entidá, dao que'l términu Lucus designa una "viesca sagrada" xeneralmente rellacionada con antiguos cultos relixosos. La pallabra Asturum patrimonializa'l llugar como monte sagráu de los ástures, y en particular, ensin dubia, del clan de los llugones. Pa presentanos l'estáu actual y les perspeutives de futuru d'esti importante yacimientu -declaráu BIC pol Principáu en 2024 cola proteición de cuasi 200 000 metros cuadraos de superficie- naide meyor qu'Esperanza Martín. El proyeutu d'escavación de Lucus Asturum, coles caberes campañes de 2021, 2022 y especialmente 2024, constitúi'l so principal trabayu arqueolóxicu n'Asturies, de los diez que dirixe na actualidá. Destaquen equí dellos fechos: la escavación d'una necrópolis (cola exhumación de 30 cuerpos, na so mayoría medievales), l'apaición d'estructures y materiales romanos, l'usu de teunoloxíes avanzaes, un equipu investigador multidisciplinar, la collaboración internacional y l'espardimientu científicu de los afayos.

Esperanza Martín lleva 25 años d'arqueóloga y ta considerada como una de les principales especialistes n'arqueoloxía romana y medieval. Aparte del redescubrimientu de Lucus Asturum, les sos investigaciones dexen avanzar na conocencia de les práutiques funeraries y na evolución de los asentamientos rurales n'Asturies. Son significativos tanto la collaboración d'espertos internacionales como l'empléu de nueves teunoloxíes na cata arqueolóxica. Puede destacase tamién d'ella el so oficiu de topógrafa, pola relevancia qu'esta formación apurre a la planimetría, a l'analís espacial y a la metodoloxía, que garanticen la calidá y exautitú de los rexistros arqueolóxicos. Dirixe anguaño unos 10 proyeutos d'investigación, centraos principalmente na dómina romana y de conquista. La so producción científica inclúi llibros, capítulos de llibros, artículos científicos, ponencies y materiales d'espardimientu y metodoloxía de los que ye única autora o coautora. Atopamos más de 70 testos de so n'Academia.edu, imposibles de categorizar colos datos accesibles. Ye tamién una ilustradora de descomanáu talentu, caracterizada pola práutica d'un arte con perspeutiva de xéneru, que trata de representar el pasáu ensin sesgos. Ta acabante recibir, xunto a Xuacu Amieva, el Premiu Yumper 2024 "Asturianos de braveza" otorgáu pola Asociación Cultural pa la Defensa de los Valores Humanos.