Axenda Mazucu

Proyección "Bloody Sunday"

N'Irlanda del Norte, el 30 de xineru de 1972, trece persones morrieron nes cais de la ciudá de Derry (Londonderry pa los ingleses) y otres catorce resultaron mancaes poles bales del exércitu británicu. Yéren unos civiles desarmaos que participaben nuna manifestación contra'l decretu del Gobiernu británicu autorizando los internamientos preventivos. Esti día, que se conoz na hestoria pol nome de Bloody Sunday (Domingu Sangrín), foi crucial na hestoria contemporánea del problema irlandés porque convirtió'l conflictu (que vién arrastrándose dende hai más de 700 años) nuna guerra civil, fizo que munchos mozos se integraren nel IRA y alimentó un ciclu de 25 años de violencia. La película cuenta lo que pasó esi día, dende l'aalborada hasta l'atapecer, dende la llegada de les tropes a les cais de la ciudá sitiada hasta la violenta actuación de los soldaos del formidable Reximientu de Paracaidistes contra los manifestantes civiles, y sigue con dalgo más de detalle a cuatro homes: Ivan Cooper, llíder de los defensores de los derechos civiles, llenu d'idealismu y que comparte'l sueñu de Martin Luther King d'algamar un cambiu pacíficu; Gerry Donaghy, un rebelde católicu de 17 años, que desea afitase y casase cola su moza (protestante) pero que se ve arrastráu pol enfrentamientu colos soldaos; el xeneral de brigada Patrick MacLellan, comandante del exércitu británicu en Londonderry, que se ve presionáu pa que detenga con firmeza la manifestación, y un xóven soldáu, un operador de radio de los paracaidistes, que, xunto a la su unidá d'aguerríos veteranos, recibe la orden d'entrar nel Bogside.