jueves 16 de octubre de 2025 - 19h30
Presentación del llibru "Eva" de Ersi Sotiropoulos
Esti xueves, 16 d'ochobre, a les 19:30 h presentación d'«Eva» d'Ersi Sotiropoulos. Intervienen: Dani Menéndez (traductor) y Rafa R. Valdés (Ediciones Trabe). Llugar: Llibrería Trabe (C/ Fernando Alonso, 17 - Uviéu). ¡Esperámosvos!
Evento de Llibrería Trabe
Nesta novela vais topar una radiografía de los baxos fondos d'Atenes vistos pola psique d'una muyer, Eva, que quiciabes representa a muyeres que son encantadores y intelixentes y que, por mor de les circunstancies, tán confinaes nuna zona gris que ye, en realidá, una vida sin salida.
Ersi Sotiropoulos tien dicho que nesta novela vais topar una radiografía de los baxos fondos d'Atenes vistos pola psique d'una muyer, Eva, que quiciabes representa a muyeres que son encantadores y intelixentes y que, por mor de les circunstancies, tán confinaes nuna zona gris que ye, en realidá, una vida sin salida. Bien falao, Ersi. Eva ye eso y tamién ye una nueche d'insomniu pela que vemos una Grecia afuruñada per dientro. Una nueche qu'empieza con una mierda de fiesta a la que nun te conviden y que muestra una Atenes marxinal, desconocida hasta pa quien viven nella. Nesti viaxe pelos barrios onde desapolinen a la xente pa especular, pel que vamos trevesar cementerios colapsaos y cais enllenes de basura (que nun ye solo la de policíes y diputaos) y conocer lladrones, prostitutes y xente célebre, vamos andar per places que paecen salíes d'un cuadru de De Chirico y nun vamos querer volver p'an casa. P'acabar, contaba falavos tamién de los bichinos doraos, pero quiero más callar la boca y deseavos dalgo que pueda facese realidá como que, igual que pensaba Eva de la que baxaba les escaleres de la vida, nun escaezáis esta nueche per Atenes na que los trapos de ñeve borraron el resclavu del perru muertu. Ponéi la cigua en pescuezu, tenéi cerca profiteroles (¡y uzo!) y empezái a lleer.
