Axenda Mazucu

Conferencia "Estructura y función del traxe asturianu"

CONFERENCIA D'ÁSTURA'L MARTES 11 DE PAYARES:
"ESTRUCTURA Y FUNCIÓN DEL TRAXE ASTURIANU (con vistimientu de les prendes en direuto)" con la doctora n'Historia y antropóloga FE SANTOVEÑA, autora de numberosos estudios sobre la indumentaria tradicional asturiana.
-----------------
Atenéu Obreru de Xixón Escuela de Comerciu, 2ª planta Martes 11 de payares, 19:00 hores
-----------------
Ástura ufierta esti mes de payares un actu singular que xune la reflexón académica cola guapura plástica d'una recreación visual: falaremos a fondu de la indumentaria tradicional asturiana como espresión viva de la nuesa identidá.

La doctora n'Historia y antropóloga Fe Santoveña, especialista nel tema, analizará la estructura y la función de les prendes que se vistieron n'Asturies y que construyeron la identidá asturiana. El so estudiu avéranos a un conceutu esencial: el cuerpu vistíu ye la espresión material d'una idea sobre cómo queremos ser vistos socialmente, y esa perceición algama un valor singular cuando se trata de la indumentaria identitaria d'un país.

Mientres la esposición de Fe, un grupu de collaboradores dirá vistíéndose en públicu coles distintes pieces del traxe tradicional, nun procesu que permitirá apreciar, pasín a pasu, la bayura de formes, texíos y colores que carautericen la nuesa indumentaria más representativa. Esta puesta n'escena, de gran plasticidá y guapura, revelaranos la téunica y la función de cada pieza, y amosará'l conxuntu estéticu y simbólicu que nos identifica como asturianos. Elegancia, historia y memoria coleutiva.

Trátase, en resume, d'una oportunidá pa deprender del nuesu propiu pasáu y contemplar cómo la tradición conviértese nun llinguaxe visible y actual. La identidá asturiana téxese -lliteral y emocionalmente- nes llorces de la so vistimienta.
------
FE SANTOVEÑA
FORMACIÓN
• Doctora n'Historia y antropóloga.
• Máster n'Investigación antropolóxica y les sos aplicaciones.
• Máster n'Historia y análisis sociocultural.
• Miembru del RIDEA y del Centru de Estudios Alfoz de Gauzón.
• Historiadora de l'asociación La Corexa. Ente 1990 y 2000, diez años percorriendo Asturies esplicando la estructura y función de la indumentaria tradicional.

ESPERIENCIA PROFESIONAL
• Comisaria d'esposiciones nel Muséu del Pueblu d'Asturies.
• Cursos d'estensión cultural d'Antropoloxía social y cultural na mesma institución.
• Profesora d'Historia y Antropoloxía Social y Cultural na Universidá Popular de Xixón. Varios años.
• Profesora nel IES Pérez de Ayala d'Uviéu, nel turnu de nueche, dende va 6 años.

PUBLICACIONES SOBRE INDUMENTARIA ASTURIANA
• 7 ARTÍCULOS importantes en revistes d'investigación antropolóxica o culturales:
- 4 en Cultures (ALLA)
- 1 en Perifèria (revista d'investigación antropolóxica de la UAB)
- 1 en Disparidades (revista d'antropoloxía del CSIC)
- 1 en Revista de folclore (Caxa España)
• 2 LLIBROS espublizaos pol Muséu del Pueblu d'Asturies:
- Traje tradicional, indumentaria popular y construcción del cuerpo en Asturias.
- Vestidos de asturianos. 150 años de fotografía e indumentaria en Asturias.
• 2 CAPÍTULOS DEL LLIBRU Baile y danza tradicional en Asturias (MPA)
- La función social del baile en la Asturias tradicional
- Vestidos para bailar
• PONENCIES Y CONFERENCIES EN CONGRESOS. A destacar:
- Identidad asturiana e indumentaria tradicional nel III Congresu d'Indumentaria popular. Muséu Nacional del Traxe.
- Aderezos de aldeana, la joyería en el traje popular asturiano, nel II Congresu Européu de Xoyería, Muséu Nacional del Traxe.

OTRES PUBLICACIONES
• LLIBRU Balada triste de los teyeros de Llanes. Muséu del Pueblu d'Asturies
• LLIBRU Vida sexual en la Asturias tradicional. CH Ediciones
• ARTÍCULU na revista científica Antropoloxía Experimental.
Primer estudiu espublizáu nel mundu sobre'l parentescu ente neandertales:
"Primos hermanos. Del salvajismo a la cultura, reflexiones sobre la teoría de la alianza desde el parentesco entre neandertales".