sábado 29 de noviembre de 2025 - 19h
Presentación del poemariu «Los fíos de Bauman»
Esti poemariu, editáu por Trabe, parte de la tesis de Zygmunt Bauman de "modernidá líquida". Fízose col premiu "Fernán-Coronas" en 2022.
Para saber un poco más:
"Los fíos de Bauman aprovecha l'imaxinariu sociodiscursivu del sociólogu Zygmunt Bauman como puntu de partida pa facer una reflexón crítica sobre les carauterístiques de la nomada «modernidá líquida» y les sos consecuencies, de dos maneres: per un llau, dende la propia esperiencia del autor, repasando vivencies y emociones personales rellacionaes cola familia, la emigración y los trabayos precarios; y, per otru llau, nel panorama social d'anguaño, tocando cuestiones como la desinformación, l'abusu de les redes sociales, la contaminación y la preocupación por defender la diversidá con un enfoque interseicional. Como pretendía Bauman colos sos ensayos, dende la perspeutiva de la modernidá liquida búscase un discursu alarmista y reactivu, dacuando señardosu, pero ensin perder el tonu esperanzador.
Gonzalo Llamedo Pandiella (Nava, 1990) ye doctor n'Investigaciones Humanístiques y profesor de Filoloxía Románica na Universidá d'Uviéu. Anguaño fai parte de la xunta direutiva de l'Asociación d'Escritores d'Asturies y collabora col Gobiernu del Principáu d'Asturies como xuráu en dellos premios de lliteratura asturiana. Dende'l 2020, vien collaborando como autor de testos lliterarios coles revistes Lliteratura y Formientu. Como escritor en llingua asturiana, ganó'l XXVIII Premiu de Poesía «Fernán-Coronas» (2022), el II Concursu de Microrrellatos Luisa Rebollar del Ayuntamientu de Sariegu (2019), el I Concursu #AndanciuLliterariu d'Iniciativa pol Asturianu (2020) y el V Concursu de Microrrellatos Entaína a escribir, entamáu pol Gobiernu del Principáu d'Asturies y l'Institutu Asturianu de la Mocedá (2020)".
Evento de La Llocura Llibrería-Café
