martes 9 de diciembre de 2025 - 19h
Conferenia "Iconografía musical nel románico astur"
El martes 9 d'avientu, a les 19:00h, nel llocal social del Atenéu Obreru de Xixón (Cai Francisco Tomás y Valiente, 1 - 2ª Planta), Ástura organiza la conferencia Iconografía musical nel Románicu Astur , a cargu de Dani García de la Cuesta.
Esta actividá mensual en torno a la promoción de la cultura asturiana ye una collaboración ente les entidaes Atenéu Obreru de Xixón y ÁSTURA.
Esta conferencia, resume d'un trabayu de más de 30 años que cubre un descomanáu arcu cronolóxicu dende la prehistoria hasta los nuestros díes, propón un percorríu detalláu pela iconografía musical que se conserva n'Asturies, especialmente la que fai referencia a la música y a la danza nel arte románicu. L'análisis d'estes representaciones nun solo mos permite afondar na función estética y simbólica d'eses imáxenes, sinón tamién entender meyor el contestu social y cultural nel que se crearon y emplegaron. A lo llargo la conferencia vamos ver cómo la comparanza cola iconografía d'otros territorios del Occidente européu apúrrenos un gabitu fundamental pa datar les obres ya interpretar con mayor rigor el so significáu. Esti enfoque comparativu ayuda, amás, a identificar rasgos comunes y especificidaes qu'allumen el desenvolvimientu de les práutiques musicales medievales. Un aspeutu especialmente curiosu ye que, n'algunos casos, ye posible siguir el filu conductor d'esta práutica musical dende la Edá Media hasta la tradición contemporánea, lo qu'asoleya una sorprendente sobrevivencia de formes y materiales, instrumentos y conceutos musicales que lleguen hasta güei.
Dani García de la Cuesta ye colaborador de diferentes asociaciones d'etnografía y folclor. A lo llargo de la so trayeutoria formó parte de grupos folk como Güercu, Beleño, Merlín y Lliberdón. Anguaño collabora con delles formaciones, como Zapica, amás de participar nos grupos Mandilín, nel dúu Harpe Diem y n'Esvilla, asociación qu'atropa un grupu d'especialistes na cultura tradicional asturiana. Formose musicalmente en diverses escueles de música y conservatorios, onde deprendió'l dominiu d'instrumentos clásicos, pa llueu prosiguir con una formación autodidacta centrada na investigación y práutica de la música folk y la interpretación d'instrumentos tradicionales, que son el resultáu de una continuidá histórica ininterrumpida de más de 800 años. Ye autor de dellos llibros, y na so páxina d'Academia.edu pueden consultase de baldre 112 trabayos d'investigación y espardimientu sobre patrimoniu cultural asturianu y otres temátiques asemeyaes. Miembru fundador de la Escuela de Música Tradicional La Quintana de Xixón, conferenciante sobre temática tradicional (música, xuegos, deportes, indumentaria, cultura popular...) con actividá en tou tipu de centros culturales, escolares, facultaes, museos y conservatorios, mantién una actividá continua en proyeutos musicales y culturales, con participación n'investigaciones, conciertos, presentaciones y talleres didáuticos, ente otres iniciatives de promoción y caltenimientu del patrimoniu musical asturianu.
