Axenda Mazucu

Conferencia: "Somiedu: Muncho más qu'osos y teitos"

CONFERENCIA

SOMIEDU: MUNCHO MÁS QU'OSOS Y TEITOS

El martes 13 de xineru, a les 19H.00', nel llocal social del Atenéu Obreru de Xixón (Cai Francisco Tomás y Valiente, 1 - 2ª Planta), Ástura organiza la conferencia Somiedu: muncho más qu'osos y teitos a cargu de Xosé Alba Alonso.

Esta actividá ye una collaboración ente les entidaes Atenéu Obreru de Xixón y ÁSTURA, pa facer una actividá mensual de cultura asturiana.

Somiedu ta a diariu nes redes sociales y nos medios de comunicación, dacuando a cuenta la vuelta ciclista, dempués pola nieve o el fueu, la inauguración d'un miradoriu o milenta coses más. Per otru llau, xorrez enforma venceyar Somiedu solo a teitos y osos, escaeciendo dafechu una abondosa bayura de recursos de toa miente. Ye cosa de facer llabor pa que nun s'escaezan esos otros bienes de Somiedu que tan por debuxar y dar a ver, porque hai muncha xente que fizo pel país, casones, feries señalaes, cantares, mines, oficios y una riestra de grandes coses lligaes a puntos del territoriu. Teitos y osos son perimportantes, como tamién l'Ecomuséu que trabaya dende Caunéu y Veigas en dar a conocer y valorar lo propio, feries artesanes, carreres y publicaciones. El problema ye dexar pa prau una montonera recursos más que son definitorios de Somiedu y ameriten la pena. Tener una casona-palaciu d'un Gobernador de Cuba y Ministru de la Guerra, llibros dedicaos al esoterismu, a los vaqueiros o a la emigración, oficios representativos de los valles, feries nes qu'aconceyaba tol mundiu, mines, música y cancios, diversidá cultural y munches coses más… sería una ayalga en cualquier llau. Vamos poner el focu neses coses pequenes, y al par perimportantes, na conferencia sobre Somiedu, un conceyu máxicu y clisante.

Xosé Alba Alonso ye Doctor n'Economía pola Universidá Autónoma de Madrid y profesor d'Economía Aplicada na Universidá d'Uviéu. Foi l'eminente zoólogu y ornitólogu Pancho Purroy quien lu llamó "l'economista paxarólogu" pol vezu de mirar a la naturaleza más allá -o a traviés- de la economía. Destaca pola so mirada interdisciplinar, na que la economía dialoga cola naturaleza y les ciencies sociales. Ta integráu nel grupu d'investigación Llabor/Social Landscapes llideráu pola caderalga Margarita Fernández Mier, y collaboró con investigadores d'especialidaes mui estremaes (biólogos, sociólogues, inxenieros, xeólogos, filólogues, informátiques, xeógrafos, etc). Especialista na amestanza ente oxetivos económicos y mediuambientales, lleva más de venticinco años venceyáu al Máster n'Espacios Naturales Protexíos nes universidaes d'Alcalá, UAM y Complutense, punxo clases n'universidaes de Bélxica, Cuba, Francia, Hungría y Polonia, y desarrolló investigación aplicada sobre l'usu caltenible de los recursos naturales, fondos europeos y desenvolvimientu rural. Tien una fonda vinculación con Somiedu polos sos güelos (de Saliencia y d'El Va.le y Urria), reflexada en distintos trabayos d'investigación. Participa en proyeutos y organismos culturales y europeos, como la Via Charlemagne, iniciativa na qu'Asturies forma parte, y collaboró con instituciones como Parques Nacionales, IUCN y distintes comisiones d'estudiu. Ye autor y coordinador de numberoses publicaciones, ente elles "A la integración desde el aula: una vía para la cohesión social y económica en Europa" (2024).