Axenda Mazucu

Proyección "Ciutat Morta"

SINOPSIS

En Xunu de 2013, un grupu de 800 persones ocupen un cine abandonáu del centru Barcelona pa proyectar un documental. Rebauticen l'antiguu edificiu n'honor a una moza que se suicidare dos años enantes: Cinema Patricia Heras. ¿Quién yéra Patricia? ¿Por qué se quitó la vida y qué tién que ver Barcelona cola so muerte? Esto ye exactamente lo que quier dase a conocer con esta acción illegal y de gran impactu mediáticu: que tol mundu sepa la verdá sobre ún de los peores casos de corrupción policial en Barcelona, la ciudá muerta.

UN DE LOS PEORES CASOS DE CORRUPCIÓN POLICIAL

La nueche del 4 de febreru de 2006 acabó con una carga policial nel centru de Barcelona. Foi na redolada d'un antiguu teatru okupáu nel que taba cellebrándose una folixa. Ente los golpes de porra, empezaron a caer oxetos dende l'azotea de la casa okupada. Sigún relató pela radio l'Alcalde de Barcelona poques hores dempués, ún de los policíes, que diba ensin cascu, quedó en coma pol impactu d'una tiestu. Les detenciones que vinieron de siguío del tráxicu incidente relátennos la crónica d'una venganza. Tres mozos deteníos, d'orixen sudamericanu, son gravemente torturaos y privaos de llibertá mientres 2 años, a la espera d'un xuiciu nel que poco importaba quién ficiere qué.
Poco importaba que l'oxetu que firió al policía lu tiraren dende una azotea mientres que los deteníos taben a pie de cai. Otros dos deteníos aquella nueche -Patricia y Alfredo- nin siquier taben presentes nel llugar de los fechos: fueron deteníos nun hospital cercanu y declaraos sospechosos pola so forma de vestir. Poco importaba si había prebes o evidencies que exculpaben a tolos acusaos. N'aquel xuiciu nun se taba xulgándose a individuos sinon a tou un colectivu. Tratábase d'un enemigu xenéricu construyíu pola prensa y los políticos de la Barcelona modélica. Barcelona, la ciudá que acababa d'estrenar la so llamada "ordenanza de civismu", una lliy hixenista, marcu llegal perfectu pa los planes de xentrificación de dalgunos barrios céntricos, destinaos al turismu. Los mozos deteníos aquella nueche yéren cabeces de turcu que encaxaben perfectamente, pola so estética, cola imaxen del disidente antisistema: l'enemigu internu que la ciudá modélica fuera xenerando aquellos últimos tiempos.
Años dempués, dos policíes son condenaos a inhabilitación y penes de prisión de más de 2 años por torturat a un mozu negru. La sentencia demuestra que los axentes mienten y manipulen prebes mientres el xuiciu. Pa encubrir les tortures, acusen al mozu de ser traficante de drogues, pero'l xuez descubre un montaxe: el negru ye, en realidá, fíu d'un diplomáticu: l'embaxador de Trinidá y Tobagu en Noruega. Estos axentes resulten ser los mesmos que torturaron a los mozos deteníos aquella nueche del 4 de febreru de 2006 y dalgunos de los testigos que declararon na so contra mientres el xuiciu. El mesmu modus operandi en dambos casos. La única diferencia: l'orixen social de les víctimes. La enésima hestoria d'impunidá policial, acompañada por buenes dosis de racismu, clasismu y la vulneración de derechos fundamentales, too ello amparao por un sistema xudicial herederu del réximen franquista y unos políticos obsesionaos col negociu inmobiliariu que brinda la Marca Barcelona a costa de los sos habitantes.