Axenda Mazucu

Proyección "Black Mirror"

Proyección de los capítulos 2 y 3 de la primer temporada de la serie Black Mirror.

Capítulu 2: 15 millones de méritos

Hebio una vegada un mundu que nun ye real nel que nun esisten valores reales. Mozos vacíos dafechu y temerosos viven n'habitaciones con paredes dixitales nes que ven amaneceres virtuales y al mirase nel espeyu, el so avatar. Tienen una única misión na vida: volvese cada día más estúpidos. Y si consiguen sumar nel so marcador hasta quince millones d'estupideces- como xugar a videoxuegos, ver películes porno o adelgazar-, podrán canxeales por una oportunidá pa cumplir la so gran ilusión vital: participar nun reality show. Y triunfar. Y ser una estrella de la televisión.

Ente estos mozos perdíos, hai ún que tién ganas de cambiar. Los dueños del programa separtáronlu de la so amada, a quien robaron pa siempre la so dulzura convirtiéndola en puta, y eso fízo-y reaccionar. Entendió que'l sistema tá idiotizándolu pa que nun pueda pensar por sí mesmu, y yá nun quier permitilo más. Y, espada en mano, plántase delantre'l xuráu pa denunciar que la mocedá tá aletargada dafechu. El mozu glaya y glayaa con fuerza, pero naide lu escucha porque seyamos serios, a estes altures, ¿puede un solu mozu enfrentase a la voracidá del avance de la realidá virtual a la que nos vemos abocaos? …

Capítulu 3: Tola to hestoria

Hebio una vegada un mundu nel que nun esiste la pallabra intimidá. Tolos homes y muyeres lleven detrás de la oreya un discu duru enxertáu al que llamaben 'granu'. Esi granu graba tolo que-yos pasa nel día y puede proyectar el so conteníu en cualesquier pantalla de televisión. Poro, el mundu tá enllenu pantalles, hailes perdayuri: nes cases, nos bares, nos taxis, nel hospital. La memoria humana tá al alcance'l momentu.
Ye un inventu mui útil porque si nun te alcuerdes de dalgo puedes recurrir a esi momentu del día pa recuperar el recuerdu escaecíu. Coses comunes como ónde puse les llaves, a qué hora llegué a casa anuechi o cuántes perres garré del caxón.

Tamién sirve pa tener siempre la razón. Si discutes cola to muyer sobre nun me digas que nun dixisti lo que toi diciéndote que dixisti, puedes rebobinar la película'l granu y ver en vivu y en directu cuáles fueron esactamente les sos pallabres. Polo que ye un oxetu mui preciá p'alcordase de lo que a ún-y convién recordar pero, ¿qué pasa colo que queremos escaecer?, ¿colo que sedría meyor que escaeciéremos o que nun queremos que sepan los demás?, ¿qué pasa colos secretos?, ¿cola nuesa pequeña parcela d'intimidá?. Nel futuru inventáu pero verosímil que plantea 'Black Mirror' perdímosla. Y con ella, la identidá. Asina que, seyamos serios, y demos al botón de la marcha atrás.