martes 17 de noviembre de 2015 - 20h
CONFERENCIA: Iconografía del arte popular asturianu
El prósimu martes, 17 de payares, a les 20H.00', nel llocal social del Atenéu Obreru de Xixón (Cai Covadonga, 7 - 1o Izda.), Ástura organiza una charra sobre Iconografía del arte popular asturianu, a cargu de Alberto Álvarez Peña.
Lo que llamamos arte popular nun tien solamente un enfotu decorativu. No fondero trescala'l raigañu proteutor de la collecha, el ganáu y la vida. Hexapételes, radiales, tetrasqueles o esvástiques nun son debuxos xeométricos ensin más; vencéyense al sol que frañe les tiniebles ya dende los tiempos de les vieyes relixones paganes. Esti tipu de motivos, que munches veces defínense col nome xenéricu d'«arte pastoril alpinu», espárdense por horros, paneres, arcones, sobrepuertes de les cases, cuernes de mecer, gaxapos o marcos del pan y el quesu. Munches veces estes iconografíes fúndense nun sincretismu cola simboloxía cristiana de cruces, cálices o custodies, y abondos podemos rastrexalos na dómina'l bronce y atopalos notres fasteres d'Europa coles que podemos tener un acervu cultural común.
Alberto Álvarez Peña (Xixón, 1966) Escritor y dibuxante. Ye autor d'abondes obres de temática etnográfica, n'especial sobre la mitoloxía y la tradición oral asturiana. Dende 1996 forma parte de la Fundación Belenos d'Estudios Etnográficos y del conseyu de redaición de la revista Asturies editada por esta mesma fundación. Tien collaborao col Archivu de la Tradición oral del Muséu del Pueblu d'Asturies de Xixón na recoyida de materiales pal Atlas Sonoru Llingüísticu del Principáu d'Asturies. Collaborador habitual de la revista Entrambasauguas, editada pola Academia de la Llingua Asturiana. Nel campu del audiovisual foi direutor y guionista de seis documentales sobre melecina tradicional, filandones y polavilas, el diañu, los chalgueiros o, l'últimu, sobre la bruxa de Brañavara. En Televisión Local Gijón dirixó'l programa Marabayu, de temática etnográfica, a lo llargo de 2008.Ye cofundador del cómic El Llapiceru, ún de los collaboradores del Salón del cómic de Xixón, y presidente de l'Arribada. Normalmente collabora con editoriales como Picu Urriellu, vtp o Trabe. Nel añu 2011, Álvarez Peña algama'l Premiu Fierro Botas, que concede'l conceyu de Xixón, pa trabayos d'investigación y ensayu cola obra titulada Mitoloxía de los santos n'Asturies. Raigaños paganos nel cristianismu. Destaca sobremanera cola so obra lliteraria ya investigadora qu'algama a facer visible la realidá invisible al traviés de 28 llibros d'una gran especialización: la mitoloxía (13 llibros), la tradición oral y les lleendes (12), l'arte popular o el celtismu, ente otros.
La entrada ye llibre.
Atentamente,
Ateneo Obrero de Gijón