jueves 4 de febrero de 2016 - 19h30
Presentación: MEMORIA Y OLVIDO EN LA QUINTA PEDREGAL
XUEVES 4 DE FEBRERU. 19:30 h. LA SEMIENTE. CAI NUEVA 1. L'ENTREGU. SAMARTÍN DEL REI AURELIU. ASTURIES.
El compañeru Pablo Corral, militante de la CSI, mayestru, historiador ya investigador de la Memoria Histórica, vien de terminar esti trabayu imprescindible pa pescanciar una faza de la hestoria d'Avilés (Asturies), que dalgunos pretendíen siguir escondiendo.
La represión franquista ye un fenómenu históricu llargamente estudiáu demientres les caberes décades n'España. Asina, anguañu tenemos una amplia conocencia de l'aplicación de la violencia na retaguardia y demientres la posguerra. Esti estudiu analiza les polítiques represives franquistes na comarca avilesina dende'l 21 d'ochobre de 1937. Pa ello, la investigación conxuga dellos tipos de fontes primaries y archivístiques.
Esti trabayu entama col analís de les estremaes estratexes violentes emplegaes sobre la población avilesina dende la entrada de les tropes franquistes. De siguío, por aciu dellos exemplos, rellátense les distintes téuniques pa someter a una población considerada hostil. Los paseos, los xuicios sumarísimos, les palices y les multes conformen les táutiques de control de la retaguardia. La Memoria coleutiva sobre los sucesos analízase, finalmente, alrodiu la Quinta Pedregal, edificiu utilizáu como centru detención. Magar les polítiques y discursos que s'apliquen na posguerra, constátase cómo les families de les persones deteníes revindiquen dichu llugar como un símbolu de Memoria.
Dexámosvos con unes pallabres de Pablo:
"Hubo un tiempu de silenciu alrodiu la Quinta Pedregal, un tiempu de tabúes, solombres y alcordances entecortaes pola llercia. Con esti trabayu pretendo apurrir lluz sobre ún de los momentos más tráxicos de la nuesa hestoria. Son munches les motivaciones que me llevaron a espublizar esta investigación. Una d'elles ye recuperar la hestoria de los desapaecíos y desapaecíes na Comarca d'Avilés, a quien la Hestoria-yos róbo'l so espaciu, y ta dedicada a los sos familiares, quien fueron castigaos con eternu llutu de silenciu. Son munchos y munches les que m'aidastis, a toos y toes munches gracies".
