Axenda Mazucu

Conferencia "AGROALIMENTACIÓN, GASTRONOMÍA Y MARCA ASTURIES"

Organizao por Ástura y l'Atenéu Obreru de Xixón, el martes 15 de marzu, a les 20:00 hores, el cocineru y gastrónomu Lluis Nel Estrada va ufiertanos una conferencia nel llocal del Atenéu Obreru de Xixón na cai Covadonga, 7.

Baxo'l títulu de «AGROALIMENTACIÓN, GASTRONOMÍA Y #MARCAASTURIES» esti mes de marzu queremos atalantar sobre la calidá de los nuesos productos gastronómicos y, en particular, sobre la importancia y el impautu de la #marcaasturies como la meyor espresión de la nuesa propia historia y cultura gastronómiques. El país de los más de cuarenta quesos, carnes de races llariegues, estremaes formes de pescanciar la sidra, viticultura heroica, pesca caltenible, agricultura de cercanía, gastronomía tradicional, nueves tendencies gastronómiques y productives… la #marcaasturies atropa en mayor o menor midía toos estos conceutos.
Denominaciones d'Orixe o Indicaciones Xeográfiques Protexíes, pasando por Marques Coleutives de menos rangu, tolos nuesos productos amuesen la necesidá d'acoyese a la #marcaasturies d'una forma más o menos nidia. Lo mesmo asocede cola nuesa gastronomía. Poro, queremos responder a estes cuestiones: ¿qué debemos entender por cocina asturiana nel sieglu XXI? ¿cuála ye la nuesa identidá gastronómica?
P'atopar respuesta a estes entrugues, vamos intentar facer un someru percorríu al traviés la nuesa realidá gastronómica procurando analizar el momentu actual de la mesma d'un mou críticu y constructivu.
------------------------------------------
LLUIS NEL ESTRADA ye:
• Cocineru y gastrónomu rioseyanu que xunce nun tou la pasión pola cocina cola vocación comunicadora. Poro, dende los sos anicios como ayudante de cocina nel restaurante La Huertona de Ribeseya en 1992 a güei, Lluis Nel Estrada fizo con ésitu los llabores más importantes del so oficiu: cocineru, cocineru xefe, primer cocineru, etc, al empar que foi a afondar nos aspeutos comerciales, de marketing y de xestión de la actividá hostelera hasta exercer per dellos años el cargu de Direutor Gastronómicu y Responsable de Comunicación nuna empresa de tantu prestixu como Tierra Astur/Crivencar.
• Na so actividá docente puso cursos de formación en téuniques culinaries, ufierta gastronómica, ellaboración de productos cocinaos y precocinaos y de certificación profesional. Tamién pon añalmente una Masterclass en Xestión y Desenvolvimientu de la Industria Alimentaria.
• Anguaño ye Direutor xerente y propietariu de 40 Primaveres, Gastronomía y Comunicación, empresa consultora y estudiu de comunicación venceyáu al mundiu de la hostelería y l'agroalimentación.
• A Lluis Nel Estrada nun se-y resiste nenguna actividá col envís d'esparder los sos conocimientos. Dirixó Xornaes Gastronómiques rellacionaes cola abondosa variedá de los nuesos quesos o coles races llariegues, el gochu asturcelta y el corderu xaldu, y tamién programes de radio, como «Tiempu de xintar». Aveza espublizar artículos especializaos y collaboraciones gastronómiques en revistes, como la so seición selmanal n'Asturias24. Ufierta conferencies sobre cocina tradicional. Asoleyó dellos llibros de gastronomía, ente los que destacamos «Con tastu a sidra», «Cocina tradicional asturiana en cuatro estaciones» y «Cuarenta quesos, cuarenta platos. Los quesos asturianos y sus recetas», a más de desenvolver pa La Nueva España el coleicionable «Asturias, el país de los cuarenta quesos y sus recetas», el mayor trabayu d'espardimientu de los quesos asturianos espublizáu hasta agora. Dirixe y coordina la campaña «De la Rula» pa la promoción de la pesca artesanal caltenible nel Oriente y ye responsable de les aiciones de promoción de la marca coleutiva «Pescado de Rula» de la Federación de Cofradíes de Pescadores d'Asturies. Recibió gallardones importantes, como «Queseru Mayor d'Asturies» en 2006 y «Uva Madura» de la DOP Vino de Cangas en 2014.