miércoles 13 de abril de 2016 - 19h
Solidaridá Asturiana nun campu de refuxaes griegu
El prósimu miércoles 13 d'Abril nel Centru Social La Llume tenemos una charra sobre la esperiencia de dos solidaries asturianes nel campu de refuxaes de Ritsona en Grecia.
Pa ello vamos tener con nós a Itziar Fuente, recién llegá del campu de refuxaes de Ritsona (Grecia). Esta compañera va desplicanos de primera mano la situación que sufren les persones que viven nestos campos, les condiciones nes que malamente sobreviven y les sos espectatives de futuru.
Persones condergaes a emigrar y abandonar la so vida escapando de les cribes de l'Estáu Islámicu y d'esta "falsa guerra fría" na que corten el pastel les grandes potencies (Rusia, Turquía, EE.UU., el propiu gobiernu de Siria…) escondiendo los sos caniles tres de "l'aición humanitaria" y la llucha escontra'l terrorismu islamista.
Tamos viendo díi a díi cómo malamente avanza esta situación, cómo la europa del gran capital entama a deportar a les refuxaes con un destín inciertu, cómo se puen vender les vides de persones a cambiu de 4 duros a un de los países más xenocides del mundiu como ye Turquía.
Cómo somos capaces d'abandonar a les nueses hermanes siries, kurdes, afganes, iraquíes, pakistaníes, nixerianes... y una llarga llista que se suma a toles persones de toles nacionalidaes que yá lleven una montonera d'años emigrando hacia la falsa europa de la esperanza y sufriendo les mesmes o peores consecuencies que les d'agora.
Ante esta situación nun nos pue faltar la solidaridá como la de les compañeres Itziar y Borja, que sofitaron col so granín de sable y a la vez llevaron la solidaridá de munches persones más. Pero tamién ye necesario que sigamos denunciando esta situación, que nos plantemos, que salgamos a les cais y glayemos ¡Basta!
¡Basta de Xunión Europea!
¡Basta de Imperialismu!
¡Basta de Fronteres!
¡Basta de Guerres!
¡Basta de Capitalismu!
¡BIENVENÍES REFUXAES!
Si quereis tar al tantu d'estes y de toles actividaes tan prestoses que facemos nel Centru Social La Llume, axuntáivos al nuesu canal oficial de Telegram.
Namás que tenéis que pinchar nesti enllaz:
https://telegram.me/joinchat/ALoc9jwCWVYnsUPl_3xovA
