Axenda Mazucu

Charra. Desmantelando'l territoriu. Estáu actual de la línea del AVE en Asturies

El xueves, día 2 de xunu, nel CSA La Semiente de L'Entregu va tener llugar a les 19:30H la charra informativa:"Desmantelando'l territoriu: Estáu actual de la llínea de l'AVE en Asturies". La charra va correr al cargu de la Asamblea de vecinos contra l'AVE". Integren esta asamblea les vecines de los conceyos per onde se prevé siguir col trazáu nel tramu L.lena-Uviéu.
La implantación de l'alta velocidá demostró sobradamente la so insostenibilidé en términos económicos y ambientales. Pa ganar unos minutos na conexón ente les ciudaes, l'AVE desvertebró'l territoriu que dexaba al so pasu. Nel casu d'Asturies les obres del tramu Llión- La La Pola L.lena tuvieron que ser paralizaes por causa de les estroces xeneraes, qu'inclusive imposibilitan la circulación de l'AVE. Esto nun foi una torga pa la recién proyección del tramu que pretende xunir La Pola de L.lena con Uviéu.
El pasu de l'AVE per Asturies ye'l tramu más caru del estáu y el cuartu más caru del mundu, un proyectu inciertu y que ta causando verdaderos problemes medioambientales non solo na aguada norte del cordal sinón tmaien na sur, dellos ríos de Llión tuvieron problemes col so calce y tán secando munches fontes. Falarán de les razones poles que s'oponen, en qué consisten y como se realicen esti tipu d'obres, del impactu que suponen nel mediu y pal conceyu de L.lena en concretu, lo mesmo que de les alternatives que se plantegen al so trazáu. Tamién repasarán esperiencies locales de lo que l'AVE dexa tres de sigo, y van analizar les posibles consecuencies que supondría la implantación del nuevu tramu.
La charra complétase cola esposición fotográfica "AVE, destruyendo la tierra a Alta Velocidá", que puede visitase hasta'l día 9 de xunu.