Axenda Mazucu

Presentación del Llibru: El viaxe a la lluz

Xueves 9 a les 20:30H.
Presentación del Llibru: "El viaxe a la lluz" . Premiu Alfonso Iglesias de Cómic. Col autor Ruma Barbero.
Ruma Barbero vuelve a La Semiente pa presentar la so nueva y permiada obra. Va ser esti xueves día 9 a les 20:30 cuando l'autor faiga l presentación del so llibru 'El viaxe a la lluz', novela gráfica cola que se fexo col premiu Alfonso Iglesias de Cómic del añu 2015. Na década de los cincuenta del sieglu XX, mientres les democracies de mediu mundu entamaben el viaxe de reconstruyise moral y físicamente mirando pa un futuru en paz y llibertá, la dictadura española, fascista y nacional-católica, entraba na so segunda década d'autarquía y aisllamientu, basada nun sistema de castes decimonóniques. Mentanto, nos montes asturianos desendolcábase, quiciabes, la última llucha romántica na Europa continental.
Nuna dómina d'allancamientu social, represión política, adoctrinamientu relixosu, capadura moral y atrasu cultural, cualquier contactu col esterior yera una lluz a la que siguir.
Les vivencies reales de la so familia materna cola guerrilla'l conceyu Ponga, válen-y a Ruma Barbero pa entamar un rellatu de ficción amable y enllenu de lluz dientro de los años más grises de la nuestra historia recién.
Rumaldo Antón Barbero, Ruma ye un autor ya conocíu nel mundo del comic y la novela gráfica, Manzajú y La Chelita son testimoniu desa faceta. Trabaya como dibuxante y guionista de cómic, ilustrador, diseñador gráficu, maquetador editorial, percusionista y lletrista. Persona conocida enforma dientro'l mundo la música ya que ye miembru fundador de grupos de folk asturianu ente los que rescampla Felpeyu, pero tamien lletrista pa munchos otros grupos. Cuenta con un Premiu de l'Academia de la Música en 2008 y dellos Premios AMAS.