jueves 16 de junio de 2016 - 20h
Presentación de la novela. “Lluvia d’agostu”. XXXVI Premiu Xosefa Xovellanos de Novela
La memoria histórica, nesti casu tiñía con ficción novelada, vuelve a La Semiente, esta vez de la mano del autor Paco Alvarez, que va presentar la so última novela "Lluvia d'agostu". La cita va ser el xueves 16 de xunu a les 20:00h y xunto col autor tamién tará Daniel Alvarez Prendes, un de los responsables de la editorial Hoja de Lata, que falará un poco desti proyectu editorial independiente que'n mui pocu tiempu de vida ta garrando un nome bien importante dientro'l mundo lliterariu pol gustu pa coles obres qu'espublicen.
Dani, que vien de participar en dellos movimientos sociales y otros proyectos de prensa alternativa habíos n'Asturies, nun sedrá la primer vez que faiga una intervención en La Semiente, pero sí va ser la primer vez pa Paco, quien tamién tien participao en dellos colectivos y movimientos sociales, como fue'l de la Insumisión, condición que lu llevó a tar presu por ser consecuente coles sos idées, al negase a faer el seviciu militar y la prestación social sustitutoria.
El periodista, conocíu yá por otres obres y por ser un de los lletristes del grupu Dixebra, consiguió con esta obra'l XXXVI Premiu Xosefa Xovellanos de Novela, un premiu que non solo ye un reconocimientu al so trabayu sinon tamién un respaldu a la hora de sacar el llibru pel mundu alantre. La obra xira alreor de la figura del conocíu revolucionariu Durruti. Dempués duna fondera documentación historiográfica, Francisco Álvarez recrea con maestría los ambientes de la época, evoca brillantemente a los sos protagonistes, y devuelve a la vida, baxo la lluvia fino d' agostu, al iconu d'aquella revolución llibertaria que duró un branu enforma curtiu. El 20 de payares de 1936 morría un home y nacía un mitu. Buenaventura Durruti, el mecánicu, el pistoleru anarquista, l'espropiador de bancos, el cenetista carismáticu, el milicianu de la Barcelona antifascista.
Mediu sieglu dempués, una periodista francesa enfótase n'esclariar el misteriu de la muerte del revolucionariu llexendariu naquel Madrid que-y negaba'l pasu al avance fascista. Nesta investigación vamos ser testigos del primer gran atracu a mano armada nel Estáu español, el del Bancu d'España en Xixón, vamos siguir los pasos clandestinos de Durruti y los sos compañeros Ascaso y Jover per América Llatina, vamos acompañalos al esiliu francés pa preparar la insurrección y vamos empobinanos pa Zaragoza cola Columna Durruti llueu de parar el golpe militar en Cataluña. Una búsqueda que va llevar a la periodista a topase coles pantasmes de la so propia historia familiar.
Val la pena dir a la presentación y val la pena lleer el llibru.
