Axenda Mazucu

Conferencia "El Muséu de la Gaita: Afitando una identidá"

La conferencia d'esti mes lleva'l títulu de «EL MUSÉU DE LA GAITA: AFITANDO UNA IDENTIDÁ» y nella, el direutor del Muséu de la Gaita de Xixón, Fonsu Fernández, va facer un percorríu fonderu polos movimientos culturales que lleven a la creación d'esti Muséu'l 29 de xunu de 1966, el primeru qu'hebo en Xixón. Nun aveza pasar que'l primer muséu d'una población seya d'estes carauterístiques. Poro, los raigaños fonderos d'un equipamientu talu hai que los allugar nun tarrén abondo más anchu que lo que ye puramente la museoloxía. Ún de los tópicos más espardíos al rodiu la gaita foi'l so calter pastoril, qu'anicia na iconografía tardomedieval venceyada cola Anunciación a los pastores y l'Adoración, nes que la gaita taba presente de vezu. Ayena a la «alta cultura», nun taría güei ente los oxetos dignos de caltener ensin un procesu de puesta en valir de les cultures populares. Trataremos d'esti procesu nel que la cultura campesina pasó a ser seña d'identidá y oxetu d'estudiu científicu, mentanto que diba dibuxándose'l nuevu mapa políticu, que sofitaba na idega de qu'un puelu con llingua y cultura propies tien el drechu de convertise nun estáu independiente. Con esti enfotu, los poderes públicos emprincipiaron a desendolcar polítiques culturales, yá prefiguraes nel despotismu illustráu del sieglu XVIII; ente elles, la criación d'instituciones culturales y particularmente museos.
Estes tres exes (valorización de la cultura popular, nacionalismu ya institucionalización de la cultura) son fundamentales pa entender cómo la gaita pasó de ser un productu de les clases illetraes a ser un oxetu patrimonial que güei vemos nos museos. Repasaremos les circunstancies históriques, ideolóxiques, polítiques y culturales que triaron el camín pa que'l Conceyu Xixón abriere esti muséu, qu'asitia la gaita nel mapa cultural y social d'Asturies y del mundu.
----------------------------------------
FONSU FERNÁNDEZ ye llicenciáu en Filoloxía Hispánica pola Universidá d'Uviéu y doctor en Musicoloxía.
Ye direutor del Muséu de la Gaita de Xixón dende 1997.
Tien espublizaos los llibros "Guía didáctica del Museo de la Gaita" (2000) y el "Cancionero de la gaita asturiana" (2 tomos con estudiu históricu y partitures, 2011). Destaquen tamién numberosos artículos de tema musical (rellacionaos cola zanfona y la gaita asturiana, de los que ye amás instrumentista) espublizaos nes revistes "Asturies, memoria encesa d'un país", RIDEA o Etno-Folk, Revista galega de etnomusicoloxía.
Ye autor del discu "Ea, señores usías. Cantares y sones de ciegu n'Asturies" (1999), asina como collaborador instrumentista en discos de los grupos Lliberdón (del que foi miembru), el Grupu Cultural Xana, Brenga Astur o Muyeres.
Debe tamién sorrayase el trabayu organizativu y de direición de diez esposiciones de tema musical nel ámbitu del Muséu Etnográficu del Pueblu d'Asturies (Xixón), asina como'l so llabor de comisariu d'otres ayenes al Muséu.