martes 17 de enero de 2017 - 20h
CONFERENCIA La nuesa llingua y les tierres al sur del cordal
CONFERENCIA
La nuesa llingua y les tierres al sur del cordal
Este martes, 17 de xineru, a les 20H.00', nel llocal social del Atenéu Obreru de Xixón (Cai Covadonga, 7 - 1o Izda.), Ástura organiza una charra sobre La nuesa llingua y les tierres al sur del cordal, a cargu de Xosé Lluis García Arias.
Na conferencia del Caderalgu de Dialeutoloxía de la Universidá d'Uviéu, Xosé Lluis García Arias, encamentarase la conveniencia de dir llogrando una conciencia cultural y llingüística nes tierres que foron pertenencia de los pueblos ástures (Asturies, Lleón, Nor-occidente de Zamora y Miranda del Duero) qu'entá conserven güei, en dalguna midida, la vieya llingua romance común.
Xosé Lluis García Arias nació nel conceyu de Teberga y algamó'l grau de Doctor en Filoloxía Románica pola Universidá d'Uviéu en 1974. Per munchos años enseñante de secundaria nel institutu de Lluanco al empar que profesor na Universidá d'Uviéu, llogra más tarde plaza na Universidá de Valladolid y, llueu, na de Lleón (l'añu 1981), dende onde llega a Uviéu otra vuelta pa convertise en Caderalgu de Dialeutoloxía l'añu 2009. Foi ún de los fundadores del movimientu reivindicativu de la cultura y la llingua asturiana Conceyu Bable y el so primer presidente, hasta que ye escoyíu pa presidir asinamesmo l'acabante crear Academia de la Llingua Asturiana, cargu que desempeñó ente 1981 y 2001. La mesma Academia tien asoleyao que García Arias ye'l "padre de la Filoloxía Asturiana", polos sos rigurosos y fondos trabayos d'investigación toponímica y etimolóxica. Gracies al so trabayu científicu l'asturianu ye güei llingua de comparanza nos diccionarios etimolóxicos romanísticos de referencia obligada, como'l Dictionnaire Étymologique Roman, ensin escaecer los estudios de sociollingüística, los lliterarios o les coleiciones académiques qu'entamó. Y foi quien, penriba tou, a empobinar les xeres precises pa la construcción del estándar asturianu coles tres ferramientes imprescindibles de la llingua: les Normes ortográfiques, el Diccionariu normativu y la Gramática de la Llingua Asturiana, ente otres. La so producción bibliográfica ye inmensa dende aquel primer llibru sobre "El habla de Teberga. Sincronía y diacronía". Llibros, artículos, estudios, reseñes, propuestes etimolóxiques… Y ente los años 2002-2004 llega al públicu en xeneral el so "Diccionario General de la Lengua Asturiana", asoleyáu en fascículos por la editorial de La Nueva España. García Arias ye un renomáu espertu nel estudiu de les llingües romániques, pero tamién ye una persona clave na reivindicación de los derechos llingüísticos asturianos y na esixencia de la oficialidá de la llingua.
La entrada ye llibre.
Atentamente,
Ateneo Obrero de Gijón