Axenda Mazucu

Arte popular de tradición barroca n'horros y paneres

Organizado por Ástura

Baxo'l suxeridor títulu de «ARTE POPULAR DE TRADICIÓN BARROCA N'HORROS Y PANERES ASTURIANOS» esti mes de febreru falaremos d'arte nos horros d'Asturies. L'horru y la panera, carauterísticos de l'arquitectura popular asturiana, son un elementu decisivu na configuración del hábitat y el paisaxe rurales de nueso y son productu d'una llarga evolución que vien, cuando menos, de tiempos medievales. Y ye precisamente l'horru, propiu d'una sociedá llabriega, el mueble qu'ufierta un xenerosu contéu pal xorrecimientu de manifestaciones artístiques de caráuter pictóricu o de talla que darréu enllacen con elementos artísticos «cultos», como portaes d'ilesies, retablos, atechaderos, mobiliariu, etc., por más que cronolóxica y estilísticamente son heteroxéneos. Esplícase asina'l frecuente anacronismu de los gustos artísticos populares, que caltienen o reactiven trazos de tradición románica o barroca per llargu tiempu tres l'acabamientu del estilu orixinal.
Los horros asturianos entamen a amestar, cuando menos dende'l sieglu XVI, elementos artísticos medievales yá desaniciaos o a piques d'ello, como'l románicu o el mudéxar. L'apaición de la panera fae posibles esquemes compositivos más trabayosos y más enguedeyaos que s'espurren per puertes, colondres, vanos y barandales yá a metaes del sieglo XVIII, cumal del arte aplicáu a horros y paneres. Esta tradición barroca enancharáse a lo llargo de tol sieglu XIX y parte del XX, por más qu'amuesa una evolución simplificadora de los diseños dieciochescos pero arriquecedora del repertoriu del arte popular asturianu.
----------------------------------------
JESÚS ANTONIO GONZÁLEZ CALLE ye doctor n'Historia pela Universidá d'Uviéu (2001) y profesor del Departamentu de Ciencies Sociales del I.E.S. César Rodríguez de Grau.
Entamó'l so percorríu investigador centráu na historia llocal («Historia de Corvera de Asturias y su área», 1996), onde axunta delles perspeutives d'estudiu (xenealogía, arte, etnografía, arqueoloxía, etc.). Yá enfotáu na Edá Media y na historia social, fizo la so tesis doctoral sobre «La nobleza en Asturias durante la Baja Edad Media: génesis y evolución de linajes representativos» (premiu d'Investigación Juan Uría Ríu, 2002). Espublizó asina mesmo artículos tanto en revistes especializaes como llocales sobre dellos personaxes de la nobleza asturiana. Participó en diverses campañes arqueológiques nos túmulos neolíticos de Monte Areo (Carreño), el castru prerromanu del Campón del Olivar (Villaviciosa), el castiellu altomedieval de Peñaferruz (Xixón), o la ilesia de San Salvador de Priesca (Villaviciosa). Tamién trabayó pal Principáu d'Asturies nes memories histórico-artístiques sobre Santiago de Gobiendes (Colunga), el santuariu del Carbayu (Llangréu) y el cascu urbanu de Cuideiru. Per fuera d'Asturies executó un proyeutu d'investigación sobre despoblaos d'época baxomedieval y moderna na comarca d'El Barco de Ávila.
Del estudiu d'elementos artísticos y etnográficos del conceyu de Corvera aportó tamién el so interés pola talla popular, especialmente presente en paneres y horros. Incorporáu a les más nueves llinies d'investigación sobre'l tema espublizó na revista "Asturies. Memoria encesa d'un país» un estensu artículu con un importante y mui actual averamientu a les distintes tradiciones y tendencies artístiques nos horros corveranos.

https://www.facebook.com/events/1854833391442614/