Comentar (0)EnviariCalCompartir

martes 21 de marzo de 2017 - 19h30

Conferencia sobre'l mundu rural al traviés de l'arqueoloxía

«EL FUTURU D'UN PASÁU: EL MUNDU RURAL A TRAVIÉS DE L'ARQUEOLOXÍA»
Esti mes de marzu Margarita F. Mier va falanos de cómo a lo llargo milenios el ser humanu foi tresformando'l paisaxe hasta llegar a la configuración que tien angüaño. Un paisaxe munches vegaes consideráu «natural» (asina lo sopelexa'l Principáu d'Asturies) pero que, por embargu, hai que camentar como una construcción social que tien un doble componente: la tresformación por aciu de l'arramplu de los sos recursos, y la ellaboración d'un conxuntu de significaos que camuden a lo llargo'l tiempu y que tresformen el paisaxe nun espaciu privilexáu pal estudiu históricu de forma complexa.
L'estudiu del paisaxe dende la historia y l'arqueoloxía fadrá visibles grupos sociales que xeneralmente nun tuvieron percuriaos: pon nel centru l'análisis a les persones de l'aldea y la so capacidá y determín a lo llargo'l tiempu na xeneración y caltenimientu d'un patrimoniu que tien que ser valoráu dafechu nes actuales polítiques del territoriu.
Nos caberos años l'equipu d'investigación de Margarita F. Mier entamó un proyeutu arqueolóxicu sobre'l paisaxe rural, tomando como modelu de trabayu dos aldees asturianes con estremada trayeutoria histórica y asitiamientu xeográficu: Vigaña Arcéu (Miranda) y Villanueva (Santuadriano). Dambes apurriéron-yos una importante información arqueolóxica que da valor históricu al nuestru paisaxe.
----------------------------------------
MARGARITA FERNÁNDEZ MIER ye doctora n'Historia pola Universidá d'Uviéu (1995) y Premiu Estraordinariu de doctoráu. Güei ye Profesora Titular d'Historia Medieval nel Departamentu d'Historia de la Universidá d'Uviéu.
Desendolcó la so actividá científica en delles instituciones de caráuter públicu y priváu: Universidá de Lleón, Universidad SEK (Segovia), Institutu d'Historia (CSIC), Escuela Española d'Historia y Arqueoloxía de Roma (CSIC). En diches instituciones desplegó un gran llabor docente en distintes asignatures rellacionaes cola Edá Media.
Dio cursos de doctoráu nes Universidaes de Lleón, Santiago y País Vascu. En xunetu de 2016 xúnese a la Universidá d'Uviéu como profesora Titular d'Historia Medieval.
Proyeutos de investigación:
• La so investigación centróse nel estudiu de l'Alta Edá Media nel NO Peninsular, con especial procuru al análisis del poblamientu y a la organización de los paisaxes agrarios analizaos dende la doble perspeutiva de la documentación escrita y l'arqueolóxica, dende la dómina romana hasta la Plena Edá Media.
• Participó en más d'una ventena de proyeutos d'investigación d'ámbitu español ya internacional, ente los que destaquen: "La formación de los paisajes del NO peninsular. Siglos V-XII» (2010-2013), y «Poder central y poderes locales entre la Antigüedad Tardía y la Alta Edad Media, 400-900 d.c., el norte de Hispania y su contexto europeo» (2014-2017), financiaos pol Ministeriu d'Economía y Competitividá; "Transhumance in Norway and Northen Spain: a comparative study", financiáu pol Centre for Rural Studies of Tromheim (Noruega).
• Tien numberosos artículos d'investigación espublizaos (una docena d'ellos n'asturianu nes revistes Cultures y Lletres Asturianes de l'Academia de la Llingua Asturiana), centraos sobre too nel estudiu del paisaxe y l'espaciu agrariu, les práutiques ganaderes, el poblamientu rural, la so cadarma social y la so rellación col territoriu, etc.
• Anguaño'l so llabor investigador empobínase al estudiu de la xénesis de los espacios agrarios dende'l rexistru arqueolóxicu y remanando'l métodu comparativu, a partir del análisis de los sos procesos de xestación n'ámbitos xeográficos diferenciaos y con una problemática metodolóxica distinta: les árees de montaña de la Cordillera Cantábrica y les árees de la meseta.

Organizado por Ástura