Axenda Mazucu

Conferencia: Procesu socesoriu na monarquia asturiana

Col títulu de «PRÍNCIPES ÁSTURES: CLAVES ANTROPOLÓXIQUES DE LA SOCESIÓN NA MONARQUÍA ASTURIANA (familia estensa y sistemes d'herencia)» esti mes d'abril Fe Santoveña va falanos de cómo y por qué desendolcáronse los derechos socesorios como lo ficieron.

Organizado por Ástura en el Ateneo Obrero de Gijón.
Hai un añu entrugábamonos n'Ástura si puede construyise una identidá sobre la mentira, o -dicho con un conceutu antropolóxicu- sobre una mitopraxis como la de Cuadonga, gran mitu fundacional asturianu. Güei traemos un puntu de vista antropolóxicu novedosu sobre la socesión nel reinu d'Asturies. Lloñe d'analizar cuestiones polítiques y enguedeyos económicos nes lluches pol poder, nesta conferencia tentaremos de facer un averamientu dende'l puntu de vista de l'Antropoloxía Social y Cultural, particularmente sobre les rellaciones de parentescu y les llexitimidaes heredatibles. Los sistemes «cognaticios» como referentes p'afitar el llinaxe familiar ufren nueves ferramientes que permiten nun solo pescanciar les rellaciones ente llinaxes, sinon tamién decatase de quiénes y en qué momentu foron escoyíos o refugaos como los «principales» pa exercer el poder na monarquía ástur.
----------------------------------------
FE SANTOVEÑA ye doctora n'Historia pola Universidá d'Uviéu (2015) con un sobresaliente cum laude y doctorando nel Departamentu d'Antropoloxía Social y Cultural de la Facultá de Filosofía de la UNED. Tien dos Máster n'Investigación antropolóxica y les sos aplicaciones, UNED (2014) y n'Historia y análisis sociocultural, Universidá d'Uviéu (2012).
Comisaria d'esposiciones nel Muséu del Pueblu d'Asturies, vien dando, dende 2014 hasta güei mesmo, cursos d'estensión cultural d'Antropoloxía social y cultural na mesma institución. Foi varios años profesora d'Historia y Antropoloxía Social y Cultural na Universidá Popular de Xixón (2007-2010).
Fe Santoveña, gran especialista n'indumentaria tradicional asturiana, tien espublizaos cuatro llibros, dos sobre esti mesmu tema: «Traje tradicional, indumentaria popular y construcción del cuerpo en Asturias (1860-1920)». Xixón. Muséu del Pueblu d'Asturies, y «Vestidos de Asturianos. 150 años de indumentaria y fotografía en Asturias». Xixón. Muséu del Pueblu d'Asturies (2013); y otros dos sobre cuestiones d'antropoloxía asturiana bien estremaes: «Balada triste de los teyeros de Llanes». Xixón. Muséu del Pueblu d'Asturies. (2010) y «Vida sexual en la Asturias Tradicional». Uviéu. CH Ediciones (2007).
• Participó con dos capítulos nel llibru «Baile y danza tradicional en Asturias», editáu por Muséu del Pueblu d'Asturies en 2008: «La función social del baile en la Asturias tradicional» y «Vestidos para bailar».
• De los sos artículos destacamos pola so importancia: «Asturianos en América. Fotografía, identidad y traje tradicional en la emigración (1880-1900)», Revista de Dialeutoloxía y Tradiciones Populares del CSIC y «Vestidas de aldeana. Indumentaria tradicional, identidad y clase social en el Oriente de Asturias. 1860-1920», Revista de Folclore, nel Anuariu de 2015.
Foi ponente tamién en dos importantes congresos organizaos pol Museo Nacional del Traje (MNT) en Madrid. Nel «III Congreso de indumentaria popular. El traje popular, icono y patrimonio», l'añu 2012, participó cola ponencia: «Recuperando la memoria. Identidad asturiana e indumentaria tradicional». Les directores del MNT dixeron, tres d'aquella ponencia, que'l discursu formidablemente presentáu y documentáu de Fe Santoveña «marcaba un antes y un después en la historia del Museo». Nel «II Congreso europeo de joyería Vestir las joyas. Modas y Modelos» nel añu 2013, organizáu pol Centru d'Investigación del Patrimoniu Etnolóxicu, na mesma institución del MNT, presentó la comunicación «Aderezos de aldeana. La joyería en el traje popular asturiano según las fotografías de Vicente Pérez Sierra. (1867-1882)». Esta comunicación ta yá espublizada pol Ministeriu d'Educación, Cultura y Deporte.