lunes 1 de mayo de 2017 - 12h30
Bloque antiespecista - Manifestación 1º de mayu - Xixón
Nel primeru de mayu hai que recordar con espolín y odiu de clas a quienes morrieron per un mundu meyor, llibre de toa opresión y esplotación de clase burguesa, onde la igualdá fora daqué apalpable dafechu.
Los años pasen y sigue'l capitalismu, dirixíu yá sía pol lliberalismu y dempués pola etapa histórica neolliberal que pasamos, onde se perfeicionó esta máquina de destrucción y espoliación de la tierra, especies animales incluyíes (toles especies somos oxetu d'esplotación).
Un sistema d'esplotación y muerte que promueve la esplotación de la especie humana penriba de les demás, sían de la especie que sían, onde les oprimíes de clas pasen a ser opresores d'especie; esa ye la realidá, ver o non, oxetivamente ye asina.
Como especie humana manifestámonos contraries a la esplotación de clase, pero caltenemos, como tal, un status d'opresión, represión y muerte sobre les demás especies animales y el planeta, al consumir lo producío por esti sistema basáu en dos tipos d'opresión: una que ye económica, llamada CAPITALISMU y otra sobre determinaos valores namái aplicaos pa la nuesa especie, que ye'l ESPECISMU.
Al traviés d'esti panfletu pretendemos facer visible una llucha que tamién tien calter revolucionariu, dexando delláu reformismos y ciertos aspeutos conservadores, rancios y hasta reaccionarios cuando se fala de lliberación animal, veganismu, yá que son términos demasiao amasuñaos nel nuesu día a día.
Quienes tenemos en vista un mundu nuevu, mirámoslu col cristal de quien nun puede defendese, ensin ser salvadores de naide nin nada, namái faciendo visible lo qu'estos dos sistemes despíntennos na nuesa vida cotidiana. Lo que queremos ye alloñanos d'un consumismu veganu-capitalista porque reproduciría'l sistema capitalista mesmu y la nuesa intención ye dar otros valores de vida.
Asina, como'l sistema perfeicionó la esplotación y los aparatos ideolóxicos, tenemos de reforzar actitúes y discursos onde incluyan a otres formes d'opresión que nun se tienen en cuenta na nuestra vida cotidiana, como ye l'ESPECISMU.
¡POR UN PRIMERU DE MAYU ANTIESPECISTA!
¡ESCONTRA L'ESPECISMU LA PATRONAL YA'L CAPITAL,
LLIBERACIÓN ANIMAL!
