Axenda Mazucu

Xornaes de Consumu Responsable (pa gastalo d'equí y del tiempu)

Los espacios uvieinos L'Arcu la Vieya, Espaciu La Llegra y "Cambalache" entamen nel mes de mayu unes xornaes que col títulu "Xornaes de consumu responsable: pa gastalo d'equí y del tiempu" van tar analizando nel mes de mayu y xunu estremaes temátiques no tocante a los grupos de consumu, la producción agroecolóxica, el comerciu xustu o el funcionamientu de los supermercaos frente a les ventaxes d'otres formes de cercanía. Amás, les actividaes van rematar con una folixa popular na Plaza'l Paragües d'Uviéu.

Les actividaes programaes son les que vienen darréu:

- VIENRES 12 DE MAYU (20h) - EL MANGLAR

"DEL GÜERTU A CASA. ALCUENTRU DE PRODUCTORES Y CONSUMIDORES"

Con Laura Ibarra (agricultora agroecolóxica):

Un grupu de consumu bien organizáu pue xenerar emplegu de calidá por sigo mesmu, porque da soporte a una productora a dellos niveles. Proporciona-y seguridá, dignifica'l so trabayu, reduz l'impautu en tresportes y optimiza'l tiempu de trabayu. Xenera rellaciones sociales ya intercambiu de conocimientos.

Dolores Hoffman (socia de Catasol S. Coop Astur)

Catasol surde de delles necesidaes que s'atopen: crear un puestu de trabayu dignu y dende'l que se xestione'l futuru del proyeutu, acceder a un consumu saludable y llevar a la práutica un compromiso fonderu pa col mediu ambiente, la caltenibilidá y la ética social.

Ana Finat (Grupu de consumu de Cambalache)

El grupu agroecolóxicu de consumu de Cambalache fai por ser un espaciu d'alcuentru y reflexón sobre los productos que llevamos a la nuesa mesa. Facemos por re-deprender coleutivamente a comer productos locales, de temporada y sanos, al mesmu tiempu qu'afitamos un venceyu direutu ente consumidores y productores.
___________________________________________

LLUNES 15 DE MAYU (19 h) - L'ARCU LA VIEYA

LA OTRA RUTA DEL CAFÉ. COOPERATIVISMU Y COMERCIU XUSTU.

Esta actividá enfócase como un alcuentru ente les cooperatives FECODESA de Nicaragua y ESPANICA coles sos redes de sofitu, nesti casu'l proyeutu de comerciu xustu L'Arcu la Vieya. Nella, un miembru de cada cooperativa va informanos sobre'l so funcionamientu y desplicanos cómo son los métodos de producción de café respetuosos pa col mediu ambiente.
___________________________________________

VIENRES 19 DE MAYU (19:30 h) - LLAR LA LLEGRA

TALLER: SUPERMERCAOS NON

¿Cree usté que pue haber vida fuera'l Centru Comercial?
a) Rudimentaria ya infrahumana
b) La ciencia entá nun foi a determinalo con seguridá
c) Sí, pero por suerte los nuesos misiles tán acabando con ello
d) Cuando toi mercando nun m'entrugo eses coses

Esta ye una de les entrugues d'una encuesta fecha pola compañía teatral CONSERVAS de Barcelona va unos años. ¿Crítica?, ¿chancia?, ¿realidá?

¿Cuántes de les nueses compres se tán faciendo nos centros comerciales? ¿Cuála ye la diferencia ente consumir nellos o mercar los nuesos alimentos nes tiendes del barriu, los mercaos llocales o los grupos de consumu?

Ente toes vamos tentar de buscar rempuestes, y alternatives, a estes cuestiones, rellacionaes coles implicaciones que tienen les nueses elleiciones como consumidores conscientes.
___________________________________________

VIENRES 26 DE MAYU (18 h) - L'ARCU LA VIEYA

PRESENTACIÓN DEL LLIBRU "ECOLOGÍA SOBRE LA MESA" + TALLER DE COCINA con Iñigo González (Con-Fusión comidas) + CENADOR

Nesta actividá vamos averanos a la realidá del campu asturianu y de les sos productores, de les temporaes de les sos verdures y d'estremaes maneres d'alimentanos. Vamos deprender cómo facer hamburgueses vexetales, los sos secretos y trucos y a pásalo bien comiendo y falando d'alimentación y salú.

___________________________________________

SÁBADU 3 DE XUNU (11 h) - (Salida en Local Cambalache) TALLER VISITA AL SUPERMERCÁU.
(Y a partir de les 13h) NA PLAZA'L PARAGÜES: FOLIXA POPULAR: MÚSICA, XUEGOS TRADICIONALES, COMIDA…

La nuesa ciudá tien bien de supermercaos a los que podemos dir a mercar tolos díes. La mayoría facemos toes (o bona parte) de les nueses compres cutianes nellos, pero… ¿fíxámonos nel tipu de productu que vienden?, ¿sabemos cómo funcionen les nomaes "marques blanques"?, ¿parámonos a pensar nes sos campañes publicitaries o na manera en que cubrimos les nueses necesidaes de consumu?

Proponémosvos a participar nuna visita guiada a unu d'esos supermercaos pa poder responder a estes y otres entrugues.
Y darréu, dende les 13 h, convidámosvos a xintar na céntrica Plaza'l Paragües d'Uviéu, onde amás vamos poder compartir alderique, música, xuegos tradicionales…