Axenda Mazucu

L'Orixe asturianu del Far West

CONFERENCIA D'ÁSTURA'L MARTES 21 DE PAYARES:
AMABLE CONCHA, DOCTOR EN DERECHU PÚBLICU Y ANTROPÓLOGU, VA FALANOS DEL ORIXE DE LA CULTURA "BUCKAROO" NEL MEDIU OESTE AMERICANU Y LOS SOS VENCEYOS COLOS NUESOS VAQUEIROS.
A LES 19:30 HORES. XIXÓN
Cai Cuadonga, 7.
----------------------------------------
Baxo'l prestosu títulu de «L'ORIXE ASTURIANU DEL FAR WEST» esti mes de payares facémonos unes entrugues mui interesantes: ¿por qué esisten al empar nos Estaos Xuníos cowboys y buckaroos («va-quei-rus»)?, ¿d'aú vien la cultura buckaroo?, ¿por qué atopamos una abondosa cantidá de nomes de familia esclusivamente vaqueiros nel senu d'esta comunidá?, ¿qué partes de la so cultura tan más averaes a nós?, ¿puede afirmase l'orixe asturianu d'esta comunidá del mediu oeste americanu?

Estes son dalgunes de les entrugues que'l doctor en Derechu Públicu y antropólogu Amable Concha va responder na conferencia de payares d'Ástura. Asuntu que mos dexa clisaos pola novedá, ye frutu d'un trabayu d'investigación empobináu a afitar, partiendo de les pallabres vaqueiru/buckaroo -que tienen semeyanza fonética y un mesmu significáu, pero que s'alluguen en entornos xeográficos y contestos culturales peralloñaos-, l'orixe vaqueiru de la treshumancia ganadera nos Estaos Xuníos. Amable Concha esforcióse n'asitiar la isoglosa del términu buckaroo, n'investigar la onomástica vaqueira en norteamérica y el so espardimientu xeográficu, n'afondar na bayura cultural de la comunidá a traviés de la Buckaroo Society Inc. y n'asoleyar numberoses semeyances cola nuesa propia comunidá vaqueira. Un afayu percuriosu y orixinal sobre la herencia asturiana nos Estaos Xuníos d'América.