lunes 11 de diciembre de 2017 - 19h
Entrega del Premio DDHH Ayto de Siero al COPINH
Premio Internacional Drechos Humanos Conceyu Siero 2017
Esti añu'l destín del gallardón va pa Hondures, al COPINH, que sinifica Conseyu Cívicu d'Organizaciones Populares ya Indíxenes d'Hondures.
Van venir pa recibilu dos de les sos integrantes: María Teresa Guevara y Alan García, que mos van acompañar el llunes 11 d'avientu nel Auditoriu a les 19 hores.
¿Qué ye'l COPINH y cuálos los méritos pal premiu?
Trátase d'una organización qu'axunta a más de doscientes comunidaes del pueblu indíxena lenca y que se convirtió nel movimientu ambientalista más combativu. Consiguió evitar la destrucción de sitios sagraos y la restitución de tierres espoliaes a les comunidaes indíxenes.
Destaquen les aportaciones en mediu ambiente, n'igualdá de les muyeres, en drechos indíxenes; y cómo esta organización texó redes importantes en tol continente con otres organizaciones, sobre manera en defensa de la naturaleza. La so coordinadora y fundadora, Berta Cáceres, recibió, ente otros, el premiu Goldman, consideráu'l Nobel ambiental, pola so defensa de los ríos.
Pero esta xera tevo un costu altu de sufrimientu y persecución, dende l'asesinatu del propiu padre d'Alan, Tomás García, hasta'l crime de varios integrantes del COPINH, ente ellos el de Berta Cáceres, en marzu del añu pasáu, que secudió less conciencies en tol mundiu, incluso n'Asturies, dende onde Julio Arbesú y Anabel Santiago dedicáron-y un cantar: "Me acuerdo del agua".
El mesmu día en que mataron a Berta Cáceres, la ONG Global Witness, de Londres, denunció qu'Hondureas ye "el país más peligrosu del mundiu pa los activistes pol mediu ambiente". De los 116 asesinatos d'ambientalistes qu'hebo nel planeta, cuasi les tres cuartes partes produxéronse en Llatinoamérica y la mayoría d'ellos n'Hondures, ún de los países más emprobrecíos del continente.
Frente a ello, el premiu en Siero trata de contrarrestar esta inxusticia y aportar apoyu moral a les comunidaes lenques y mestices que'l COPINH representa dignamente.
Tamién una contribución a los drechos de los pueblos indíxenes, cuando acaben de cumplise 10 años de que la Organización de Naciones Xuníes aprobare la declaración, y nun momentu en que les rellaciones respetuoses de les comunidaes indíxenes cola naturaleza, que llamen Madre Tierra, suponen una aportación esencial escontra'l colapsu climáticu y pola preservación del planeta y la vida.
Esperámosvos el 11 d'avientu a les 7 nel Auditoriu.
Origen : mensaje recibido el 3 diciembre 19h