Axenda Mazucu

Concentración solidaria coles imputaes por una pancarta contra'l machismu

CONCENTRACIÓN DE SOLIDARIDÁ COLES TRES PERSONES MULTAES POR UNA PANCARTA CONTRA'L MACHISMU

MAÑANA MARTES 23 DE XINERU, a les 10:30 h, nos Xulgaos de Xixón.

BASTA D'HIPOCRESÍA DE L'ALCALDESA DE XIXÓN Y DEL AYUNTAMIENTU

Paez que queda perbién dicir que se ta contra la violencia machista y posar pa la semeya. Sicasí namá delles persones tán lexitimades pa faelo, a otres llévase-yos a identificar a comisaría y múltase-yos. Viva la hipocresía.

Fae ya más de tres años, el 1 de xineru del 2015, celebrando la nueche vieya al pasar pela valla que zarraba'l solar de l'antigua estación de tren, recoloquen una pancarta que taba medio arrancada, na que ponía "Por un 2015 llibre de machismu y represión", al paecé-yos un bon propósitu pa entamar l'añu. Al marchar son paraes pola policía llocal que-yos pide la documentación, dos d'eses persones nun la llevaben, y de nada sirve desplicá-yos de qué yéra la pancarta, llévenles a comisaría hasta que yá de mañana a los policías-yos apetez garrá-yos los datos e informá-yos de les multes de 200 euros que-yos ponen a cada una de les tres (la otra persona esperaba fuera de la comisaría).

Les multes fueron recurríes pero tres años dempués, tres ser embargaes les sos cuentes, van cellebrase los correspondientes xuicios nos que les persones afectaen piden la nulidá de les multes y la devolución de les cantidaes embargaes y cobraes por esi ayuntamientu. Los juicios tendrán llugar dos d'ellos pal día 23 de xineru a les 10:30 h, nos xulgaos de Xixón.

Paeznos una vergüenza non yá l'actuación policial, que ye más esmolecedora cuando esta fuerza ye la que diz tar formada y sensibilizada para atender a les víctimes d'esta lacra social, sinón amás la hipocresía del conceyu, qu'inclusive usó esa valla tamién para colgar pancartes ¿entós ye un espaciu habilitáu para ello o non?

Tamién n'ese mesmu llugar colgaronse nes elecciones municipales pancartes de partíos políticos. Nenguna foi multada.

Y hai un pactu social contra la violencia machista del conceyu de Xixón y otru del gobiernu de Asturies nel que dicen que "la sociedá nel so conxuntu tien de manifestar el so repulsa evidente, de manera colectiva pero tamién individualmente."
Enlace:https://www.gijon.es/multimedia_objects/downl……

Da igual pactu, da igual que s'utilizara más vegaes esa valla, da igual que dempués se punxo'l nome de Tren de la llibertá al parque qu'agora ta nesi llugar, faciendo referencia a la llucha feminista escontra la reforma de la llei del albuertu del PP. Da igual, porqu'unes salen perbién na semeya, pero les que nun salen, anque tolos díes tean lluchando escontra esta lacra social, son multaes.

BASTA D'HIPOCRESÍA Y BASTA DE MENTIRES PER PARTE DE L'ALCALDESA DE XIXÓN
BASTA DE REPRESIÓN
ACABEMOS COL MACHISMU