tema : Otros
Comentar (0)Compartir coche EnviariCalCompartir

martes 20 de febrero de 2018 - 19h30

Presentacion Atles Llingüisticu "Etlen" de la Zona Eo-Navia

CONFERENCIA D'ÁSTURA'L MARTES 20 DE FEBRERU:

EL DR. RAMÓN D'ANDRÉS, PROFESOR TITULAR DE FILOLOXÍA ESPAÑOLA Y ASTURIANA NA UNIVERSIDÁ D'UVIÉU, VA PRESENTAR EL ATLES "ETLEN": LA FRONTERA DE LOS DOMINIOS LLINGÜÍSTICOS GALLEGUPORTUGUÉS Y ASTURLLEONÉS.

ATENÉU OBRERU DE XIXÓN. 19:30 HORES.
Cai Cuadonga, 7, 1º.
----------------------------------------
Baxo'l títulu de «PRESENTACIÓN DEL ATLES LLINGÜÍSTICU ETLEN DE LA ZONA EO-NAVIA (ASTURIES)» esti mes de febreru tará dedicáu otra vuelta a la llingüística científica. L'atles llingüísticu ETLEN, acabante publicase nel pasáu mes de noviembre de 2017, ye'l mayor estudiu de conxuntu fechu hasta agora sobre les fales gallego-asturianes de la faza más occidental d'Asturies, ente los ríos Eo y Navia. Ye'l primer atles dedicáu a costa fecha a una zona de frontera llingüística, la que s'atopa ente'l territoriu del galleguportugués y del asturlleonés. Con 1.088 páxines, inclúi 643 mapes a tou color, que describen con tou detalle les característiques llingüístiques de los 40 llugares encuestaos. Tien la novedá de ser la primer obra del so xéneru qu'inclúi secciones d'estadística llingüística (llamaes "horiométrica" y "dialectométrica"), que conformen un retratu percompletu d'esta zona d'Asturies.
----------------------------------------
Ramón d'Andrés (Madrid, 1959)
• Fíu del escritor Manuel d'Andrés «Mánfer de la Llera», ye profesor titular de Filoloxía Española y Asturiana na Universidá d'Uviéu.
• La so trayectoria investigadora vincúlase a variaes temátiques rellacionaes col asturianu: descripción gramatical, léxicu, normativa, situación sociollingüística, toponimia y dialectoloxía. Foi corredactor de les Normes Ortográfiques y del Diccionariu de la Llingua Asturiana, y ponente de la Gramática de la Llingua Asturiana, obres de l'Academia de la Llingua Asturiana (ALLA).
• Miembru de númberu de l'ALLA y correspondiente del Real Institutu d'Estudios Asturianos.
• Coordina'l grupu d'investigación «Seminariu de Filoloxía Asturiana», de la Universidá d'Uviéu.
• Director de los proyectos «Estudiu de la Transición Llingüística na Zona Eo-Navia, Asturies (ETLEN)» y l'«Observatoriu Asturianu de Neoloxía y Terminoloxía» (AsturNeo)».
• Miembru del comité de redacción de la Revista de Filoloxía Asturiana y de la Xunta Asesora de Toponimia del Principáu d'Asturies.
• Ente los sos llibros figuren: Diccionariu temáticu de la llingua asturiana (1991), Encuesta sociollingüística nuna parroquia asturiana (Deva-Xixón) (1993), Gramática práctica de asturiano (1997), Cuestiones d'asturianu normativu (2001-2003), Juicios sobre la lengua asturiana. Algunas cuestiones básicas acerca del debate lingüístico en Asturias (2002), Diccionario toponímico del concejo de Gijón (2008), Lengua, ciencia y fronteras (coordinador, 2011), Gramática comparada de las lenguas ibéricas (2013). Coautor, xunto con Fernando Álvarez-Balbuena, Xosé Miguel Suárez y Miguel R. Monteavaro, de la obra "Estudiu de la Transición Llingüística na Zona Eo-Navia, Asturies (ETLEN). Atles dialectográficu - horiométricu - dialectométricu" (2017), que presentamos nel actu de güei.
• Desenvuelve tamién un intensu llabor de divulgación en llibros, ensayos y artículos de prensa.
--------------
© Semeyes: Ramón d'Andrés

Tus comentarios

Información adicional y comentarios de los visitantes del sitio

Tus comentarios

Be the first to comment