jueves 31 de mayo de 2018 - 19h
PRESENTACIÓN DEL LLIBRU:"UNA MALETA ENLLENA RECORTES"
El prósimu xueves, 31 de mayu, a partir de les 19:00 hores, nel Atenéu Obreru de Xixón (Cai Covadonga, 7 - 1º Izda.), el grupu teatru Telón de Fondo fará la presentación del so llibru UNA MALETA ENLLENA RECORTES.
UNA MALETA ENLLENA RECORTES ye´l recorríu pola hestoria del más veteranu de los grupos independientes asturianos. Nel tardofranquismu (más concretamente en 1973) ye cuando naz esti grupu al calicor de la daquella empresa nacional siderúrxica Ensidesa, na so factoria de Xixón.
D´entós p´acá munchos son los años andaos y munchu el camín fechu por esti grupu teatral que foi quien a adaptase a los tiempos y a les circunstancies. Esti llibru-homenaxe, con cubierta de la pintora Helena Toraño, ye mui muncho visual, y arrecuéi lo que la crítica teatral foi escribiendo en dellos diarios o selmanarios sobre les representaciones del grupu y qu´esti foi guardando na maleta del recuerdu en formatu de recorte de periódicu. D´ehí´l títulu, polo demás, ambivalente: recorte de periódicu, sí, pero tamién recorte nel presupuestu cultural nun país yá poco dau a lo cultural.
La presentación tará a cargu d´Inaciu Galán, periodista y escritor, acompañáu na mesa por Xulio Vigil, miembru fundador del grupu, y Lluis Antón González, autor del testu. Abrirá y pesllará l'actu el saxofonista Gimi, acompañáu d'un guitarrista.
La entrada ye llibre.
Atentamente,
Ateneo Obrero de Gijón
