jueves 31 de mayo de 2018 - 19h30
Mazcaritos d'Uvieu. Una mazcarada urbana
Les mazcaraes d'iviernu son un patrimoniu cultural en toa Europa que remóntase a tiempos arcaicos de civilizaciones agraries. La capital d'Asturies como tantes otres villes asturianes tenía una mazcarada urbana y semirural que salía a pidir l'aguinaldu en tiempu d'antroxu, y queda memoria del so nome: los mazcaritos o mazcarites. Del antroxu d'Uviéu tenemos datos dende'l sieglu XVII. Pintólu Evaristo Valle en 1928, na so famosa Carnavalada de Oviedo. Prohibío pol franquismu, tornaron los carnavales cola democracia, pero les modes foriates camudaron los vezos tradicionales, hasta los díes de celebración, en plena Cuaresma. Dábase por escaecida, pero los barrios y pueblos del Conceyu, de fuerte raigañu asturianu, caltienen ñicios d'esta vieya mazcarada. Personaxes como la destrozona, los sábanos, los zaparrastros, la rollona y el so fíu cuarentón, el galán y la madama, el vieyu y la vieya, el cura y el diañu coloráu, la osa y los zíngaros, el ciegu de les coples, los soldaos, los zuavos, los sopistes, etc. pidíen l'aguinaldu peles cases y chigres, diben danzando y provocando a la xente, representaben comedies y moxigangues, cantaben coples d'escarniu colos acontecimientos del añu y facíen risión de les autoridaes civiles y eclesiástiques d'una ciudá de provincies, burguesa, clerical y militar, pero tamién obrera y popular.
ÁNXEL NAVA. Artista visual, escritor y asturianista, investiga y trabaya en Paraíso Local Creativo con una xente entusiasta que dende 2017 tán faciendo por recuperar la tradición, recreando una comparsa pa correr l'antroxu peles cais del barriu antiguu tres de 80 años d'ausencia. Los Mazcaritos d'Uviéu alegren y plasmen a la ciudadanía cola folixa, y anque falte muncho camín por andar podemos dicir que la recuperación d'esta mazcarada ye una realidá. Abrieron el desfile de Carnaval esti añu, participaron nos XI Alcuentros de Mazcaraes d'Iviernu de Valdesoto (Siero) y acaben de tornar de Lisboa invitaos al XIII Festival Internacional da Máscara Ibérica FIMI 2018.
Presenta la charra PABLO CANAL, vicepresidente de l'asociación El Cencerru pola recuperación de los Sidros y Comedies de Valdesoto, la primer mazcarada que ta propuesta como BIC, Bien d'Interés Cultural y patrimoniu inmaterial del Principáu d'Asturies, que ye bon conocedor del movimientu de recuperación de mazcaraes tradicionales n'Asturies y na península Ibérica.
Organizado por Manglar
