martes 19 de junio de 2018 - 19h30
MESA REDONDA ¿POR QUÉ NECESITAMOS UN “MUSÉU DE XIXÓN”
Mañana martes, 19 de xunu, a les 19H.30', nel llocal social del Atenéu Obreru de Xixón (Cai Covadonga, 7 - 1o Izda.), Ástura organiza la mesa redonda ¿Por qué necesitamos un muséu de Xixón?
El 18 de mayu los direutores de los museos de Xixón piden nun arrenunciar al usu como muséu del edificiu de Tabacalera. Esti ye un alderique abiertu nel que queremos participar, porque queremos un Muséu de Xixón. ¿Por qué? Les ventayes y porgüeyos d'esta institución sedríen bultables:
• Sedría un gran equipamientu, el referente museísticu de la ciudá. Un llugar pa conocer la so hestoria, el so esporpolle urbanu, la evolución de les sos actividaes campesines, pesqueres o industriales, de descomanada importancia hestórica. Sedría llugar d'esposición de la so bayura artística, colos espacios afayadizos pa la so presentación y estudiu; focu de cultura y d'actividaes científiques, d'investigación, d'espardimientu y, tamién, d'identidá; elementu cimeru d'atraición d'un públicu lo mesmo llocal que visitante.
• Tendría una visión contemporánea de la función social d'un muséu, con enfoques nuevos y perspectives abiertes.
• Trátase d'una idea vieya, un envís ciudadanu, avaláu, esfotáu, por donaciones importantes de particulares y artistes.
• Cuenta dende va años con un detalláu plan museolóxicu y un proyeutu arquiteutónicu.
• La Casa Natal de Xovellanos tien graves problemes para cumplir les sos funciones, esponer los sos fondos, aumentalos y caltenelos.
Dellos colectivos oponense a ello con lo que nos abulten planteamientos socio-culturales curtios y miopes. Anguaño un muséu bien concebíu nin ye obsoletu nin ye elitista. Los museos son güei una de les instituciones culturales más evolucionaes y que mayor incidencia cultural, social y económica tienen na so comunidá. Güei son espacios d'alcuentru, desenvolvimientu social, formación personal y cooperación científica. Son un importante motor de dinamización y una de les señes d'identidá d'una ciudá. El mundu ta enllenu d'exemplos estraordinarios.
Na mesa participen Lucía Peláez Tremols, Directora de los museos de Belles Artes del Conceyu de Xixón (Muséu Nicanor Piñole y Casa Natal de Xovellanos), Ramón Alvargonzález, Caderalgu d'Análisis Xeográficu Rexonal (Universidá d'Uviéu) y Director de la Fundación Alvargonzález, y José Manuel Balbuena, Economista. Fundador del Grupu Inmobiliariu Balbuena, Columnista de El Comercio y colaborador del Canal 10 del Grupo Vocento.
La entrada ye llibre.
Atentamente,
Ateneo Obrero de Gijón