Axenda Mazucu

Al rodiu Cuadonga:Batalles mitiques na tradición oral asturiana.Territoriu ya identidá

ÁSTURA VA TENER EL PRIVILEXU DE DERROMPER LA NUEVA SEDE DEL ATENÉU OBRERU DE XIXÓN NA ANTIGUA ESCUELA DE COMERCIU COLA PRIMER CONFERENCIA D'ESTI SESTU CURSU. Sedrá'l MARTES 16 d'ochobre:
Queremos celebrar los 1.300 años del Reinu de los Ástures recoyendo, gracies a ALBERTO Á. PEÑA, tolo que mos apurre la tradición oral sobre los nuestros oríxenes como país.
ATENÉU OBRERU DE XIXÓN. 19:30 HORES.
Sede social de l'Antigua Escuela Comerciu, cai Francisco Tomás y Valiente, 2ª planta.
----------------------------------------
Baxo'l títulu de «AL RODIU CUADONGA: BATALLES MÍTIQUES NA TRADICIÓN ORAL ASTURIANA. TERRITORIU YA IDENTIDÁ» esti mes d'ochobre vamos ver qué aportó a nós d'aquella dómina pentemedies de la tradición oral. Delles batalles, mesmamente la de Cuadonga, na tradición oral asturiana, tienen un calter llendador ya identitariu, lo mesmo que les de los L.lanos de Rozamariel (Cangas del Narcea), Cinfuegos (Quirós) o el Camín Real de la Mesa (Grau, Balmonte, Somiedu), ente otros. Ye más, la batalla de Cuadonga na tradición oral, llueñe de les versiones católico-romanes que se ficieron d'ella, basaes na lleenda del emperador Constantinu en Ponte Milviu escontra Magenciu, amuesa semeyances con otres hestories de la épica céltica galesa, irlandesa y de la Galia Cisalpina, qu'equí vamos desentrellizar.
Munches veces, tres los míticos «moros», escuéndense otres realidaes arqueolóxiques onde mécense dólmenes, castros prerromanos, romanos o los islamites mesmos escorríos por Pelayu. Equí fairemos un percorríu onde va amestase arqueoloxía, hestoria, mitu y realidá.
----------
Alberto Álvarez Peña (Xixón, 1966) Escritor y dibuxante. Ye autor d'abondes obres de temática etnográfica, n'especial sobre la mitoloxía y la tradición oral asturiana. Dende 1996 forma parte de la Fundación Belenos d'Estudios Etnográficos y del conseyu de redaición de la revista Asturies editada por esta mesma fundación. Tien collaborao col Archivu de la Tradición oral del Muséu del Pueblu d'Asturies de Xixón na recoyida de materiales pal Atlas Sonoru Llingüísticu del Principáu d'Asturies. Collaborador habitual de les revistes Entrambasauguas y Cultures, editaes pola Academia de la Llingua Asturiana. L'Academia tien-y espublizáu'l llibru «El llobu na tradición oral».
Nel campu del audiovisual foi direutor y guionista de seis documentales sobre melecina tradicional, filandones y polavilas, el diañu, los chalgueiros o, l'últimu, sobre la bruxa de Brañavara. En Televisión Local Gijón dirixó'l programa Marabayu, de temática etnográfica, a lo llargo de 2008.
Ye cofundador del cómic El Llapiceru, ún de los collaboradores del Salón del cómic de Xixón, y de l'Asociación L'Arribada, de la que foi presidente.
Normalmente collabora con editoriales como Picu Urriellu, vtp o Trabe. El Xardín Botánicu Atlánticu de Xixón yá-y tien espublizaos tres llibros.
Nel añu 2011, Álvarez Peña algama'l Premiu Fierro Botas, que concede'l conceyu de Xixón, pa trabayos d'investigación y ensayu cola obra titulada Mitoloxía de los santos n'Asturies. Raigaños paganos nel cristianismu.
Destaca sobremanera cola so obra lliteraria ya investigadora qu'algama a facer visible la realidá invisible al traviés de 32 llibros d'una gran especialización: la mitoloxía asturiana (14 llibros), la tradición oral y les lleendes del país (14), l'arte popular o el celtismu, ente otros.
----------
Semeyes apurríes por Berto Peña, sacantes la del Atenéu y la de so, d'Amadéu Benavente.