martes 15 de enero de 2019 - 19h30
CONFERENCIA ¿Por qué ye necesaria la oficialidá del asturianu?
El próximu martes, 15 de xineru, a les 19H.30', nel llocal social del Atenéu Obreru de Xixón (2ª Planta de la Escuela de Comercio, cai Francisco Tomás y Valiente, 1), ÁSTURA organiza una conferencia sobre ¿Por qué ye necesaria la oficialidá del asturianu?, a cargu de Inaciu Galán.
Los defensores de les llingues asturianes y la so oficialidá, que somos la mayoría de la sociedá, queremos que los nuesos drechos tean reconocíos nun estatus d'igualdá colos falantes de castellán. Los asturfalantes nun vamos contra nadie. Cenciellamente llevamos 40 años esixendo pacíficamente'l cumplimientu n'Asturies del artículu terceru de la Constitución, que nos reconoz unos drechos hasta agora negaos por una clase política que presume de democrática. Nesta defensa de los drechos llingüísticos cada día tenemos más sofitos, y vamos xenerando un mayor consensu social que va medrando al rodiu del nuesu patrimoniu llingüísticu. Nesta conferencia, qu'entama el qu'esperamos seya l'añu de la oficialidá, vamos recordar qu'esti reconocimientu ye la ferramienta llegal pa igualar los drechos llingüísticos de los y les asturianes, en cumplimientu del mandáu constitucional. Amás va ser una manera que mos va sirvir pa mantener vivu el patrimoniu llingüísticu d'Asturies. Y tamién porque va xenerar riqueza dinamizando la industria y la economía como asocede n'otros territorios del Estáu.
Inaciu Galán ye escritor, periodista, investigador y profesor. Ta graduáu en Periodismu pola Universidá a Distancia de Madrid y diplomáu en Turismu y Especialista en Xestión Cultural pola Universidá d'Uviéu. Ta formáu como profesor na especialidá d'asturianu col Máster de Formación del Profesoráu. Anguaño prepara la so tesis doctoral. Persona perconocía nos ámbitos de la reivindicación llingüística asturiana, el so trabayu ye descomanáu en munchos campos d'actividá: como periodista, como escritor y articulista codalosu, como comunicador y xestor cultural, como tornador políglota, como profesor de llingua, como editor, como investigador y como presidente de Iniciativa pol Asturianu dende l'añu 2012. En cuasi toes estes actividaes algamó la escelencia, atropando premios de milenta instituciones y organizaciones. Entamó en 2007 ún de los primeros espacios n'asturianu de la TPA: «Al aldu: xente de casa».
Nel actu va proyectase'l documental "La vida ensin oficialidá. Les consecuencies de la falta de drechos llingüísticos n'Asturies".
Esta actividá enmarcase dientro de la collaboración ente les entidades del Atenéu Obreru de Xixón y de ÁSTURA, pa faer una actividá mensual de promoción de la cultura asturiana.
La entrada ye llibre.
Atentamente,
Ateneo Obrero de Gijón