Axenda Mazucu

CONFERENCIA ¿Cómo podemos ser asturianos?

El próximu martes, 19 de febreru, a les 19H.30', nel llocal social del Atenéu Obreru de Xixón (2ª Planta de la Escuela de Comercio, cai Francisco Tomás y Valiente, 1), ÁSTURA organiza una conferencia sobre ¿Cómo podemos ser asturianos?, a cargu de Inaciu Iglesias.

Esti mes de febreru, baxo'l prestosu títulu de "¿CÓMO PODEMOS SER ASTURIANOS?", Inaciu Iglesias va afondar nel fechu de que la única manera de querer, de verdá, al nuestru país ye asumir les nuestres responsabilidaes y tomar les nuestres decisiones en cuenta dexales -unes y otres- a los demás. Hai munches maneres de ser patriota. Iglesias lleva munchos años preguntándose qué ye ser asturianista, rexonalista, nacionalista, paisanu. Y, a lo último, llegó a una conclusión: ser asturianista ye creyer nes nuestres posibilidaes. Creyer o nun creyer; ésa ye la cuestión. Creyer nes nuestres posibilidaes a la de llevar esti negociu común; a la d'arriesgase y responsabilizase de la so xestión en cuenta dexar qu'otros arrecostinen coles nuestres perdes pa dempués protestar. Hailos que dicen que'l nacionalismu ye victimismu. O egoismu. O complexu de superioridá. Inaciu Iglesias cuenta que non; que ye tolo contrario: que -énte la inmadurez- l'únicu asturianismu posible ye atrevese a dexar atrás esa adolescencia victimista que nos achapla. Y maurecer. Dexar atrás esa inmadurez de pretender que los otros carguen coles nuestres males cuentes. Dexar atrás esi seguidismu que cuenta qu'Asturies va salir de la crisis «cuando salga España». Y dexar atrás esa galvana que nos lleva a siguir quietos paraos mirando namás «a ver qué nos cae de Bruseles». Y, pa eso, Asturies necesita a tol mundu. Porque ser un patriota, un paisanu, un nacionalista ye lo contrario de ser excluyente: ye contar que nada asturiano nos ye ayeno y que, polo tanto, la nuestra nun ye la única forma de ser asturianos. Ye asumir que tola xente tien dalgo qu'aportar. Ye, en definitiva, entender a los nuestros compatriotes, a los que nun piensen como nós; aceptar lo que tienen que dicir y avanzar. Ye asumir responsabilidaes y tomar decisiones en cuenta dexales, unes y otres, a los demás. Na conferencia d'esti mes vamos ver cómo.

Inaciu Iglesias (Uviéu, 1966) ye empresariu. Ta casáu, tien dos fíos y vive pa Valdesoto, en Siero. Llicenciáu en derechu pola Universidá d'Uviéu, completó la so formación n'alministración d'empreses, marketing y desarrollu directivu. Lleva ventisiete años trabayando na empresa familiar Cartonajes Vir de la que -depués de percorrer distintos puestos- angüañu ye'l so conseyeru delegáu. Al tiempu, como emprendedor, foi editor n'asturianu y fundó la empresa Publicaciones Ámbitu dende la qu'espublizó'l periódicu selmanal Les Noticies, discos, llibros y programes de televisión. Presidió l'Asociación Asturiana d'Empresa Familiar, el Club Asturianu de Calidá, la Fundación Caveda y Nava y la Comisión d'economía de Foro Asturies. Tamién foi conceyal en Noreña. A más de conferenciante, collabora regularmente como tertulianu y articulista n'El Comercio, la cadena SER o Canal Diez y ye autor de dellos llibros como «La identidá asturiana», «Independencia», «Fuimos quien», «Soi empresariu, confiésolo», «Salir a flote» o «El país que queremos», el so últimu llibru.

Esta actividá enmarcase dientro de la collaboración ente les entidades del Atenéu Obreru de Xixón y de ÁSTURA, pa faer una actividá mensual de promoción de la cultura asturiana.

La entrada ye llibre.

Atentamente,
Ateneo Obrero de Gijón