tema :   el más visto
Comentar (0)EnviariCalCompartir

martes 19 de marzo de 2019 - 20h

La sidra más salvaxe del mundu nel contestu internacional

CONFERENCIA

La sidra más salvaxe del mundu nel contestu internacional

(Vivencies d'un guerrilleru sidreru)

Mañana martes, 19 de marzu, a les 20H.00', nel llocal social del Atenéu Obreru de Xixón (2ª Planta de la Escuela de Comercio, cai Francisco Tomás y Valiente, 1), ÁSTURA organiza una conferencia sobre ¿La sidra más salvaxe del mundu nel contestu internacional (Vivencies d'un guerrilleru sidreru), a cargu de Eduardo Vázquez Coto.

ÁSTURA quier poner el so granín de sable en sofitu de la candidatura de la cultura sidrera asturiana a Patrimoniu Inmaterial de la Humanidá. Entá nun fae 10 años, Asturies y la so sidra yeren dafechamente desconocíes non yá pa la xente del restu'l mundu en xeneral, sinon más específicamente pa les demás rexones sidreres, situación que, por exemplu, cola sidra vasca nun se daba. Vamos falar na conferencia de marzu d'un análisis, d'una estratexa y de cómo desendolcala pa ser quién a tornar la situación y en pocos años poner la nuestra sidra onde amerita tar nel contestu internacional. Eduardo Coto falaranos tamién, como gran especialista n'otres mui estremaes producciones sidreres y na so comercialización, de lo que se cuez n'otros países al rodiu la sidra y de los proyeutos que tan desendolcándose perende. Va conseñar, asina mesmo, cualu pue ser el futuru de la nuestra sidra y del conceutu global d'esta bébora nel futuru.

Eduardo Vázquez Coto (Llangréu, 1980) ye emprendedor y promotor sidreru, importador y exportador de sidras. Pertenez al comité direutor pa la candidatura de la Cultura de la Sidra a Patrimoniu Inmaterial de la Humanidá. Estudió´n Xixón na Escuela Xovellanos en Ciencies Empresariales, lluéu fue becáu en Dresden y Frankfurt. En 2007 entró nel Bancu Santander, onde algamaría'l puestu de Direutor Financieru na Sucursal de Banca Mayorista p'Alemania, Austria y Suiza. En 2017 decidiera retornar p'Asturies, faciéndose cargu d'un proyeutu que montare en 2015 d'importación/esportación de sidres, Guerrilla Imports S.L., y d'una empresa familiar de inxenieria y proyeutos Industriales de la que ye xerente. Dende güah.e tuvo la mesma rellación cola sidra que cualquier asturianu, avezáu como taba a que los sos vecinos y dalgún familiar ficieren sidra casero. Y foi'n 2007, de la que coló pa Frankfurt (capital de la sidra n'Alemania), cuando entamó a interesase nel mundu sidreru internacional al decatase de la poca información qu'hai d'esta bébora. Dende entós participó nuna infinidá de proyeutos, collaborando na feria de la sidra de Frankfurt o cola asociación de la sidra de Gales y el so festival añal. Ye xuráu en competiciones internacionales como la «Pomme d´Or» en Frankfurt, el Campeonatu de los Grandes Llagos en Michigan, el Campeonatu Nacional de la sidra d'Australia, el World Cider Awards en Londres, etc… En 2017 montó'l primer Campeonatu Internacional de sidra n'Hernani, dientro'l Sagardo Forum ellí organizáu, con gran ésitu. Creó la Cider Week en Frankfurt, que se fae dende 2017, collaboró nos llibros más renomaos sobre sidra escritos na última década nel mundu anglosaxón y xermanu, dio conferencies na Cider Conference de Chicago, onde s'axunten más de 1.000 persones de tol mundu (más que nada de los Estaos Xuníos) pa tratar de temes sidreros durante una selmana, y un llargu etcétera más.

Esta actividá enmárcase dientro de la collaboración ente les entidades del Atenéu Obreru de Xixón y de ÁSTURA, pa faer una actividá mensual de promoción de la cultura asturiana.

La entrada ye llibre.

Atentamente,

Ateneo Obrero de Gijón